Arsenal manager Mikel Arteta chuan online-a nasa taka striker Kai Havertz leh a nupui tihbuaina chu ‘thil rawng tak’ a nih thu leh ‘tihbo a tul’ thu a sawi.
Havertz hi Pathianni zana FA Cup-a Manchester United-in an hneh tuma a khelh dan avangin sawi nawmnah zui a hlawh nasa hle a. Penalty peta 5-3-a an chak loh tum hian an chak mai theihna hun tha a bawhpelh a, a penalty pet an dansak bawk.
German nupui, Sophia-i chuan social media-a an tihna vel screenshot a dah chhuak a, heng zingah hian an fa pai mek thlenga sawina a tel a ni.
Arsenal hian police-ah thlenin specialist data firm-in a titu chhui chhuah an tum bawk a; mahse, Arteta Nilainia Tottenham nena London hmar veng derby an khelh hma atan chuan a tawk rih tih a sawi.
“Hetiang thilah hian eng emaw kan tih a ngai a ni. Chuti a nih loh chuan he thil hi kan pawm a, kan thup tihna a ni ang. Kan tihtawp a ngai a ni,” a ti.
“December 27-a Ipswich kan khelha 1-0-a kan chak khan Kai Havertz hian goal a thun a. Stadium pumah ‘Waka, Waka’ tiin an zau a. Ni 20 a liam a, hetiang hi kan ni leh si,” a ti.
“A mawhphurtute kan ni vek a, thil pawimawh tak a ni a, kei pawh min nghawng a, he industry-a tute pawh a nghawng vek a ni,” a ti.
Instagram neitu, Meta chuan hetianga invauna hi an policy bawhchhiatna a nih avangin an paih vek tawh a ni.