Mizo naupang infiammi talent nei thate zawn chhuahna tur Infiammi Bana Kaih programme (Hand Holding Empowering Mizoram Sports) chu nimin khan Chief Minister Lalduhoma’n a hawng.
Economic & Statistice Directorate Conference Hall-a hawnna inkhawmah thu sawiin chief minister chuan nikum June thla khan Mizorama a vawi khatna atan Mizoram Sports Conclave neih a ni a, India rama infiamna lama hriatna thuk tak tak neite nen kan sorkarin sports hmasawnna atana kan hmalak dan tur inrawnkhawmna a nih vakah, Mizoram sorkarin Vision 2036 a kalpui tur thu a puang tawh tih a sawi.
India ramin kum 2036 Olympic lo awm tur thlen a tum tih sawiin Lalduhoma chuan, “A dilna pawh a theh lut tawh a, kan Prime Minister Pu Narendra Modi leh ram hruaitu liante pawh an phur hle a. He Olympic lo awm tur hi thlirin Mizo thalaiten India ram aiawha Olympic 2036-a an inlan ve ngei theih nan vawiin atangin hma kan lo la ve dawn a ni,” tiin, hemi atana an tih tur hmasa chu naupang talent nei thate zawn chhuah a nih angin, chu mi hmalakna tur Empowering Mizoram Sports an hawng ta tih a sawi.
Chief minister chuan Mizo thalai thlan chhuahte hnena training tha pek mai bakah, sports infrastructure tha tak tak neih belh pawh an tum tih sawiin, “Olympic sports discipline, Mizote khelh theih chi, infrastructure kan la neih si loh lamah kan mit kan len ang. Sports minister tha tak kan nei a, a thlamuanthlak a, kum reilo teah hmasawnna hmel duhawm tak tak kan hmuh ngei ka ring,” a ti.
Sports Minister Lalnghinglova Hmar pawhin thu sawiin EMS hmalakna hian thingtlang kilkhawr ber ber a thleng phak dawn tih a sawi a. “A thlawna inpek hi kan kalphung a nih loh avangin sawmna kan dawnna hmun kan pan thin ang. A bik takin Olympic sports discipline, Mizoten theihna an neihna ni si lamah zel kan insawrbing ang,” tiin, khaw tina khawtlang hruaitute leh Mizoram State Sports Council nena tang tlangin an kal dawn bakah, thawhpui atana corporate lian tak tak nena an inbiak mek thu a sawi.
EMS bultan nan sorkar chuan Rs. vbc 2.5 a dah a, tunah hian naupang theihna nei dap chhuahna hmahruai atan Tuichangral leh Tuipuiral Games huaihawt tan chhoh mek a ni.