Manchester City manager Pep Guardiola leh a nupui Cristina Serra te chuan inthen zai an rel ve ta.
Guardiola te nupa hi kum 30 chhung inkawpin, an inneih chhung pawh kum 11 chuang a ni hman a, mahse tunah chuan an pahnih duhthlanna ngei hmanga an inthen thu sawi a ni.
An pahnih hian fa pathum neiin, Maria (24), Marius (22) leh Valentina (17) te an ni.
An inthen thu hi Spanish news outlet Sport chuan tarlang hmasa berin, an tarlan dan chuan December thla khan an inneihna tihtawp hi an lo rel tawh a, hemi chungchang hi an laichin hnaivai tak takte bakin an hre lo thung a ni.
An pahnih hian kum 2014 khan inneiin, mahse an inzui tan tak erawh chu kum 1994 a Barcelona tana Guardiola a la khelh lai a ni thung.
An inthenna thu tihfel a nih hnu hian Cristina hi an fanu naupang ber hruaiin Spain ah a kir leh nghal a, Guardiola erawh Manchester-ah a la cham chhunzawm thung. An inkar hre deuhte sawi dan chuan an pahnih hian kum nga chhung chu an lo awm hrang tawh a ni.