Aizawl: ZPM President Lalliansawta chuan vawiin thlenga kalphung thar mipui sorkar kal dan thlir hian Mizoram chu a la ding chhuak ve ngei dawn nia a lan thu a sawi a. Kalphung thar mipui sorkar chuan a dinchhan ang ngeiin Mizoramah hmasawnna thar a thlentir mek niin a sawi.
Thawhtanni khan ZPM Gen. Hqrs chuan kumin atana an party pisa hawn tan a ni a. Hawnna inkhawmah ZPM President Lalliansawta chuan, tun hma atangin Mizote eizawnna ber chu thlawhhma neih a ni a. Mautam leh rambuai hrehawm tak Mizoramin a tawh hnuah UT-a hlan kai a ni a. Phuihnam chawr leh bahra laih tur inchuh thin khan central sorkar atanga sum lo kal an han inchuh a. Ram tana project tha leh rotling tur ngaihtuahna an nei pha meuh lo nia sawiin, “Mahni pumpuarna leh tanghma hai duhnain rilru a luah hneh hle a. Mizoram chu state a nih hnuah pawh chu rilru chu an la paih hlei thei lo a. Chutianga hun rei tak kan hman hnuah, Kalphung thar mipui sorkar a lo dingchho ta a, he party-ah hian mipuite’n beiseina thar neiin an rilru tihharhin a awm chho ta mek a ni,” a ti.
Vawiin thlenga kalphung thar mipui sorkar kal dan thlir hian Mizoram chu a la ding chhuak ve ngei dawn nia a lan thu sawiin ZPM President chuan, “Hmasawnna chhenfakawm sawi tur kan hnutchhiah chho mek a ni. Thawklehkhatah kan duh leh beisei ang zawng zawng hi thleng vek thei lo mah se, Pathianin min hruai zel ang a, kan tum ram hi kan la thleng ngei dawn a ni,” tiin, ram tana thawktu zawng zawngten thahnem ngai taka an thiamna leh finna hmang zel turin a sawm a ni.
Lalliansawta chuan an hma lawka LC/VC inthlan an hmachhawn leh turah kalphung thar sorkar hmalakna tluang taka a kal theih nan leh hmasawnna chak zawka a kal zung zung theih nan khawtin leh vengtina Zoram mipuiten ZPM party thlawp theuh turin a ngen bawk.
Inkhawm hi ZPM Vice President W Chhuanawma, MLA-in a kaihruai a. He hunah hian ZPM hla thar, ‘ZPM Vul Zel Ang Che’ tih hla, C. Lalmuansanga phuah chu Chief Minister Lalduhoma’n a tlangzarh bakah, mi thar lawm luhna hun a hmang bawk.