Aizawl: Information & Public Relations department Minister Dr. Vanlalthlana hovin nimin khan Mizoram Journalists’ Association (MJA) member-te leh department-a thawktuten kum thar inhlan tharna leh thingpui inhona hun an hmang.
I&PR Auditorium-ah hun hmanah Minister Dr Vanlalthlana chuan tun lai khawvelah technology thang chak tak karah, a bikin social media-ah mi tupawhin an duhdan leh ngaihdante an puang chhuak thin a, thenkhatte phei chu content an duh luat vang leh thlirtu/ngaithlatu an duh tam avangin a him leh him lo pawh thlifim lovin, mipui rilru an hruai kawi nasa hle thin nia a lan thu sawiin, “Journalist ethic engmah awm lovin, an duh duh an sawi mai thin a, heihi kan vei a ngai a ni,” a ti.
Dr Vanlalthlana chuan journalist-te chuan mipui hnenah thudik leh rintlak, phuahchawp ni lo an hrilhhriat thin ang hi nasa lehzuala an tih a ngai a, I&PR department nen tangkawpa theihtawp an chhuah a ngaih thu a sawi.
I&PR Secretary Betsy Zothanpari Sailo pawhin thu sawiin department leh MJA member-ten thawhhona tha tak an neih chu chhunzawm zel a pawimawh thu a sawi a. Sorkar hnathawk zingah hna thawk tha duh lote chu an hna atanga chawlhtir turin thutlukna sorkarin a siam tawh a, review committee pawh din a nih tawh avangin inthlahdah leh thatchhiat vanga mahni hna thawk tha duh lote chu dim an nih dawn loh thu a sawi.
MJA President C. Lalrambuatsaiha pawhin I&PR department-in MJA member-te tana press tour buatsaihsak an nih thin bakah, tun hnaia Mizoram Journalists Pension Scheme a taka kalpui anih taka vanga lawmthu a sawi.
Inkhawm hi I&PR Director C Lalnunkima’n a kaihruai a ni.