Aizawl: School Education Minister Dr Vanlalthlana chuan zirlaiten hna an zawn hunah tunlai khawl thiamna (technology) nen an inel tawh dawn avangin zirlaibu bakah zirtirtute pawh tunlai khawvel mila an inher rem ve zel a ngai tih a sawi.
Nilaini khan School Education Complex Conference Hall-ah Mizoram Samagra Shiksha-in GEM kaltlanga Interactive flat panel an lei chu school education minister hovin semna hun hman a ni a. He hunah hian thu sawiin Interactive flat panel chu sorkar hmasa hun laia sem tawh chhunzawmna a nih thu a sawi.
Education minister chuan zirnaah hian khawvel technology changkang zel milin an kal ve thei tur a ni tih sawiin, “Zirlaite hian hna an zawn hunah tunlai technology nen an inel tawh dawn a. Chuvangin, zirlaibu bakah zirtirtute pawh tunlai khawvel mila kan inher rem ve zel a ngai a. Tunlai khawvelah hian eng nge thleng tih ngaihven a kan inchhiar var a, kan hriatna chu zirlaite kan pek chhawn ve leh a ngai a ni,” a ti.
Minister chuan classroom-a zirtirna chu smart board hmangin audio visual mode-a kalpui theih a lo ni ta tih sawiin, zirtirtute chu naupang an zirtirnaah a tam thei ang ber hmang tangkai turin a chah a. Zirtirtute chu naupangte zirtirna kawngah khalh luh tumna goal nei turte leh chumi mila kal thin tur chuan a fuih bawk.
Interactive flat panel hi school 13 hnenah sem a ni a, chung sikulte chu – Govt Chaltlang High School, Govt Hrangchhuana High School, Govt Pianghleia High School, Govt Sihphir High School, Govt KVM High School, Phunchawng RMSA Secondary School, Govt MICE High School, Govt J.L.High School, Govt Central High School, Govt Kulikawn High School, Govt Sialsuk Higher Secondary School, Govt Republic Higher Secondary School leh Govt Republic High School te an ni.