Aizawl: India president-in Mizoram governor tura a ruat, Governor-Designate Gen. (Dr.) Vijay Kumar Singh, PVSM, AVSM, YSM (Retd.) chuan nimin chawhnu dar 2:30 khan Mizoram a thleng a. Governor thar tur leh a nupui, First Lady-Designate Bharti Singh pual hian Chief Minister Lalduhoma chuan Lengpui Airport-ah amah lo lawmna leh hmuahna hun a buatsaih.
Governor thar tur hmuahna hunah hian chief minister leh a nupui Liansailovi, Speaker Lalbiakzama, Home Minister K. Sapdanga, Chief Secretary Khilli Ram Meena, DGP Anil Shukla, V. Lalsangliana, IAS, Seceretary to Governor, Brig. Girish Upadhya, SM, VSM, Sector Commander, 23 Sector, AR; Er. Lalhriatpuia, DC Aizawl, Rex Zarzoliana Vanchhawng, SP Aizawl leh official pawimawh dangte an tel.
Larsap thar tur hi Lengpuia hmuah a nih hnuah Raj Bhavan, Aizawl panpui niin tlai dar 4 khan Health Minister Lalrinpuii, Rural Development Minister Prof. Lalnilawma, Sports Minister Lalnghinglova Hmar leh Raj Bhavan thawktuten an lo hmuak a ni.
Ruahman dan chuan vawiin chawhma dar 11 hian Raj Bhavan Circular Lawn-ah Gauhati High Court Chief Justice Vijay Bishnoi-in Mizoram governor 25 nan rinawmna thu tiam tirin a la lut ang.