Aizawl: Land, Revenue & Settlement Minister B. Lalchhanzova’n nimin khan Ramhlun North-a Aizawl North Settlement Office chei that mek a tlawh.
Aizawl North Settlement Office-a section hrang hrang a fan kualnaah Revenue Minister B Lalchhanzova chuan, sorkarin office chei thatna tur sum, Rs nuai 20 hmuh a nih tawh chu tha taka hmang turin thawktute a chah a. Mipui rawngbawl tur an nih angin, office chu duhthusamin peih la ni lo mah se, mipuiin an service an nghak thup a ni tih hre chunga theihtawpa tan la turin thawktute a chah.
Minister chuan Revenue department chu U.T hunlai atanga department pawimawh tak ni tawh a, chutih rualin tihdan hlui leh tha lo zawk te inphuartir lova tihdan tha zawk leh thar zawkte chu mipuite awlsam nan leh hamthatnana kalphunga nei turin a chah bawk.
LR&S Secretary Vanlalmawia chuan, SO Aizawl North Office-ah helpdesk changtlung tak siam nise a duh thu sawiin, office dawrtuten office chhunga an kal duhna leh an mamawh hrang hrangte kawhhmuh leh hrilhfiahtu an awm chu thil tul tak a nih thu a sawi.
Mizoram sorkar chuan thlur hniha SO Aizawl then hranna hi July 25, 2024 khan a tichhuak a. Aizawl District chu Aizawl khawpui rek laiah chhim leh hmara thenin, Ramthar, Aizawl Venglai, Chanmari chin chhim lam zawng chu Aizawl South SO hian a enkawl tawh dawn a. Aizawl North Revenue Office hi VC/LC inthlan zawhah official-a hawn tum a ni.