Aizawl: February 13-16, 2025 chhunga Lunglawn mual, Lunglei-a neih tur Mizoram Thalai Kristian Pawl (MTKP) inkhawmpui vawi 48-na atana pandal sak hnatlang an kalpui mek zel.
Pandal sak hna hi Lunglawn bial TKP hian a inchhawkin, unit hrang hrangte chu chhun leh zanah hnatlang an nei thin a ni a. Inkhawmpui pandalah hian mi 10,000 vel leng tura beisei a ni.
Khawmpui pandal zau zawng tur hi a dung ft 230, a vang ft 160 tura duan a ni a. Dawhsan hi a vang ft 56x, a dung ft 28 a zaua siamin, LCD 40ft a sang, 50ft a thui dah tura ruahman a ni.
Inkhawmpui pandal hi structure siamsa, BCM Hqrs-in a neih thar, alluminium alloy structure Rs nuai 150 man a ni a. Structure awm sa hi an duh aia a tet deuh avangin tihzauh belh tura ruahman a ni.
Niminpiah khan Haulawng Bial TKP te chuan pandal sak nana mamawh dap chiksa, truck trip khat an thawh a. Hetih rual hian Lunglei South bialtu MLA Lalramliana pawhin pandal panna kawng cheibawl nan thil tul hrang hrang a lo ngaihtuahpui tawh thu MTKP hotute hian an sawi bawk.
Lunglawn Pastor bial in a thlen tur inkhawmpui senso atan Rs nuai 70 ruahman a ni a. Inkhawmpui thupuiah hian ‘Pathian hnaih rawh u (Jacob 4:8)’ tih a ni ang.