Aizawl: January 16-17, 2025 chhung hian Indian Youth Congress buatsaihin North East Youth Congress Convention and Training Camp chu Agartala Town Hall, Tripura-ah neih a ni a. He hunah hian Mizoram atangin Congress thalai President Laltawnliana leh a thawhpuite an tel.
He hunah thu sawiin MPYCC President Laltawnliana chuan hmarchhak Congress thalai vonvention hi India ram himna, democracy humhimna leh constitution humhalh tura kal khawm an ni tih sawiin, an hmalam hun atana an sakhua, an ram leh hnam himna leh intluknana tura mahni indah thaa hmalakna a nih thu a sawi.
MPYCC President Laltawnliana chuan, Congress-a sorkar lohna state apiangah BJP sorkar leh an thurualpuiten hnam hnufual leh sakhaw dang an nekchepin an palzut vek a, state hrang hrangah mipuite inpumkhatna nasa takin an tihchhiat bakah India ram mipui rilru an hliam sak tih a sawi a. Congress party chu India ram beiseina leh hmasawnna meialh kengtu an nih angin, hnam hrang hrang leh sakhaw hrang hrang ten hmalam hun eng zawk an neih theihna turin rim tak leh chhel taka thawh a ngaih thu a sawi bawk.