Aizawl: General (Rtd) Vijay Kumar Singh chu nimin chawhma khan Circular Lawn, Raj Bhavan-ah Mizoram governor 25-na ni turin tiam tira lakluh a ni.

Governor lak luh inkhawm hi Chief Secretary Khilli Ram Meena chuan kaihhruaiin president-in a ruatna a chhiar chhuak a. Gauhati High Court Chief Justice Vijay Bishnoi chuan General (Dr) Vijay Kumar Singh hi rinawmna thu tiamtirin a la lut a ni.

Governor thar lak luh inkhawmah hian hian Chief Minister Lalduhoma, chief minister hlui pahnih Lal Thanhawla leh Zoramthanga, Speaker Lalbiakzama, Home Minister K. Sapdanga, Leader of Opposition Lalchhandama Ralte, cabinet minister-te, Gauhati High Court judge, dy. speaker, minister of state-te, Lok Sabha MP, Rajya Sabha MP, MLA te, chief secretary, DGP, political party leh NGO hruaitute bakah sawm bik mi pawimawhte an tel a ni.

General (Dr) Vijay Kumar Singh chanchin tlangpui:

May 10, 1951 khan Captain Jagat Singh (a hnua Colonel ni ta) leh Krishna Kumari te inkarah Pune-ah a lo piang a. Birla Public School, Pilani leh National Defence Academy-ahte lehkha zirin, sipai a luh hnuah Indian Army Chief of the Army Staff 26-na a chelh tawh a ni.

June 14, 1970 khan 2nd Battalion of The Rajput Regiment (Kali Chindi) ah commision a ni a. Defence Services Staff College, Wellington atanga honour graduate niin, US Army Rangers Course at Fort Benning, USA leh USA Army War College, Carlisle, Pennsylvania atanga graduate a ni tel bawk.

Sri Lanka-a IPFK kaihhnawih operation avangin Yudh Seva Medal (YSM) hlan a ni a, kum 2005-a Counter Insurency force hlawhtling tak a kaihhruai avangin Ati Vishisht Seva Medal (AVSM) hlan niin, kum 2009-a Eastern Theatre-a hna tha leh chhinchhiah tlak bik a thawh avangin Para Vishisht Seva Medal (PVSM) hlan a ni a. March 31, 2010 khan Chief of the Army Staff dinhmun luah tanin, May 31, 2012 thleng he dinhmun a luah.

March 11, 2011 khan United States War College (Class of 2001) International Fellows Hall of Fame 33-na atan lak luh a ni a, Indian Armed Forces Officer zinga lak luh hmasak ber a ni.

General Singh hian March 1, 2014 khan BJP zawmin, hemi kum Lok Sabha Election khan Ghaziabad constituency (nuai 24 chuang vote awmna) atangin a chak a, India rama inhnehna sang berin a chak a ni.

MoS for External Affairs, MoS Independent charge for DoNER leh MoS for Overseas Indian Affairs mawhphurhna a chelh a ni.

Bharti Singh nen inneiin fanu pahnih leh tu pakhat an nei mek a ni.