Aizawl: Mizoram Rural Bank chuan sorkar laipui hmalaknaa faina chungchanga inzirtirna a kalpui mekah, January 16-31, 2025 chhung awh tur chu nimin zing atang khan Vana pa Hall kawt tual zawl atangin Awareness Rally-in bul an tan.
Awareness Rally a tel tur hian MRB a thawktu, khawpui chhung Branch tin atangin aiawh an kalkhawm a ni.
MRB General Manager Saibal Kanti Roy chuan kalkhawmte chu faina pawimawhna te, vantlang hmunte tihfai leh hnathawhna hmunte vawn fai kawnga tan la thar lehzual turin kalkhawmte a chah a. Faina chungchang inzirtirna bakah tunlai a inbumna tam ta lutuk laka invenna tur thuziak vantlang mipuite hnenah an sem a ni.
MRB hian Save the Riparians te nena thawk hovin, Swachhata Hi Seva 4.0 Campaign-ah khan World Bank Road a bawlhhlawh paihte an lo tifai tawh bawk.
Zirtawpni hian STR Phase III (Elimination of GVPs at World Bank Road) chu tan leh tumin, Chite lei atanga Trinity Hospital thlengin World Bank kawngdunga bawlhhlawhte tihfai a ni ang a, Sheryl L. Vanchhong, MRB Chairman in a vailiam ang.
Swachhata Pakhwada hi Mizoram chhunga khaw hrang hranga MRB Branch thlan bikte hian an hmang chhunzawm dawn a, vantlang hmun tihfaite, faina inzirna mipuite hnena pek te leh thutiam neihpuite a ni ang.