La Liga club Real Betis chuan Manchester United winger Antony chu tun season chhung loan-a lak tumin hma an la mek zel.
Brazilian hi United chanchina player an lak luh to ber pahnihna ni mah se an beisei angin a khel chhuak zo rih lo.
August, 2022 khan £ maktduai 81.3-in United hian an la lut a. Hemi hnuah hian goal 12 a khungsak tawh a, heng zinga pathum hi Premier League-a a inlan hmasak pathumah a ni.
Kum 24 mi hian April, 2023 atang khan Premier League-ah goal khat chauh a la thun leh a. Inkhel bul tantu zingah pawh a tel phak tlem telh telh a, a season hmasa bera league-a vawi 23 bul a tan theih chu season liam ta kha chuan 15-ah a tla a, tun season-ah phei chuan bul tan a la nei lo.
Tun season-a United inkhelh tawh vawi 32-ah vawi 13 chiah Antony hi a la inlan a ni.
Ninganiah pawh khan Southampton lakah Alejandro Garnacho-a vawrh luh remchang tak chu a thun lo leh a, goal ruaka tihluh mai theih anga lang chu goalkeeper Aaron Ramsdale a pe kir ringawt a ni ber mai.
Club eng emaw zatin Antony hi an ngaihven a, United hian a hlawh zawng zawng nen chhutin an hek lohna tura kaltir dan an dap.
La Liga-a 11-na, Betis hian Conference League play-off-ah thla tharah Belgian club Gent an hmachhawn a tul bawk a, he huna hman hman ngei tumin hma an la a, inremna erawh a la awm lo.