- K. Hmingthankaia
Tun Mizoram Sawrkar hi mipui sawrkar a ni bawka, mipui, a bik takin mi hnuaihnung lam ka nihpuite hamthatna leh thawven ve deuhna tur lam leh awlsamna tur lam bakah, Mihring kan nih anga nuam tak leh zalen tak, thlamuang taka kan khawsak ho theihna tura nunphung dik leh rilru dik hrisel kan neih theihna tur lam hi chu ka theih chhung chu uar tak leh na takin ka ziak zel dawn. Hengte avang hian tute emaw chuan min haw hle tih pawh ka hria. Mahse, duhamnate, mahni hmasialnate, nunphung diklo leh mahni mihringpuite ngaihpawimawh lohnate, rilru hrisel loh avanga thil tihdan tur dik tak ni lo leh fel fai lo leh, dan piah lam thil reng reng hi chu kei pawhin ka haw ve zel dawn.
Smart city-a City bus standa ding rei thin lutuk hi chu ka sawi peih tawh lo. Bakah, a sawitu nih bik reng pawh ka zak tawh. Tumah hian pawi an ti ve lo emaw ni, bus chhunga phun sur sur bak hmun danga sawi ve duh an awm si lo.Tihian mipuin veivah nana innghahtlak lohah an ngai telh telh anga, an eizawnna a chhe tial tial mai dawn a ni. Hetiang thunun thei lo sawrkar neih reng pawh hi a zahthlak. A thuhrimah, City bus-te hi tu thunun tur nge? STA nge AMC, City bus owner assocition zawk em ni?
Traffic jam tihziaawm nan public transport hman uar tur kan ti. Public transport man tlawm ber leh phur hnem thei ber bus rintlak leh si lo hi enge a awmzia? ZPM sawrkar kum nga chhung pawh hian an thunun leh thei chuang angem le? Chuvangin tuntumah chuan city bus kaihhnawih tho thil dang sawi daih ang.
Ni 6.1.2025 chhun dar 11.30 vel khan Thuampui kal turin Zarkawt atangin Bus-ah ka chuanga. Engtik lai mahin bus-ah hian thutna zawn kher emaw, mi min ken kher emaw hi ka duh ngai lo. Hmel tar lam ni tawh mah ila, rilru chu a la tlangval tlat si a. Mahse, hemi ni kher hi chuan ka nawmloh ve deuh avangin thutna ka beisei ru ve deuh tlat a, ka lawnna hmasa zawkah chuan kei aia upa awm hmel ka hmu lo chungin tuma’n min ken loh avangin ka chhuk leh a. A hnunga lo kalah ka lut leh a, a hmasa ang thoin tuma’n min kian chuang lo, ka ding ta tho a. Hetah pawh hian kei aia upa niawm chu pakhat chiah ka hmu.
Nakinah chuan kawngka bula thu nu pakhat chuan a fa kum 4/5 vel chu a hmazawna pawm ding deuhin, kei chu lo thu ve turin mi ti a, ka thu ta a. A nau lah chuan amaha thut chu a ngen chhen mai a, nuam lo ti deuhin ka thu ve reng a. Ka thawh leh chuan anmahni an zak ang tih ka hlau bawk a ni.
Stand dang kan thlen chuan, piantirh atanga kut leh ke tha lo(zeng ang deuh) pa pakhat hi tiang nen harsa ti takin a lo lut a. Kan han kal leh thleng chuan tuma’n thutna an kian ta lova, ka thutna chu ka kian ta a.
Bus chhung amite chu a ruk tein ka en kual deuh chhin a, chuta ka rilrua thil lo awm chu-Kan ramah hian chitin hnamtin, ramtin ramtang atang hian kan lut khawm tam ta lutuk niin ka hria a. Mizorama Mizo nunphung dik tak leh kan Society nun mawi takte, Kristian dik takte nun dan thate hre lo leh, rilru hrisel lo chhungkua leh zihloh fate hian hmuntin hi an chang tam ta mah mah a nih hi ka ti ta a ni. Aizawla piang seilian emaw, Mizorama piang seilian ngeite nena khawsak ho chu a la nuam hle reng si a.
Ramhlun north DIET peng kan thlen chuan nufate chu an chhuk a, ” Pawisa min la kir lo” a ti a, Conductor chuan, ” Pawisa nawi a awm lo, midang pawh ka kir lo” a ti hmuk a. ” Cheng za lai a ni si a” a ti leh a. Titau tih hriat reng hian cheng 50 emaw ni chu a pe sawk a. Nu erawh chu a lawm vak hmel loh. A nih dan tur ni lova cheng khat pawh a rirala kan rilru nawm loh dan ngaihtuahin, chu nu rilru tur chu ka dawn zui ta zel a. Passenger-ten kan theihnghilh emaw, kan dil let zak emaw beiseiin Conductor-te hian pawisa min kir loh hi an theihnghilh der thin a ni lo maw. Nitin pawisa kan zawn theuhna ramah hian, ualau tak leh langsar tak, chawpchilh taka pawisa duhna tilang huam huam ber chu City bus hi an ni ta ber awm e ka ti ta a ni.
He bus serial no. leh registration no. pawh hi ka hre reng. Mahse tunah ka sawi lo ang.