Aizawl: Chief Minister Lalduhoma’n an sorkar tuk atangin beih an tawk nghal a, thil tha an tihte hmu thei lovin sawiselna tur an zawng nasa hle tih a sawi.
Tun hnaia Aizawl South II ZPM-in R. Dengthuama Hall, Mualpuia Block Conference a hmanpuinaah chief minister chuan an sorkar tirh khan, ‘thlai thar kan buaipui ang’ an ti a. Nikumah hmunphiah bikah inremna an ziahpui company-in an timualpho hle a, kuminah erawh empanelled firm pasarihte nen agreement an ziak a, hmunphiah ro hi an lei zo vek thei lo a nih chuan sorkarin a lei dawn niin a sawi.
An sorkar tuk atangin beih an tawk nghal tih sawiin, “Thil tha kan tihte hmu thei lovin, sawiselna tur an zawng nasa hle. ‘In sawhthing lei kan ba lo,’ titute ngeiin kuthnathawktute kan han ngaihsak chu min beihna an zawng leh si a, thil tha kan ti ang tih hi an hlau em em a; mahse, kan ram tan hian thil tha tih kan thulh dawn chuang lo va, kuthnathawktute an bânah kaiin kan khai chhuak ngei dawn a ni,” a ti.
Lalduhoma chuan tun dinhmunah sawhthing pawh a chawh hun runpui an la thleng lo va, kuthnathawktute hmakhaw ngaiin a to hun an nghahpui hret a, an lo sawi tawh chu tihhlawhtlin ngei an tum tih sawiin, “Ram mipuite hian min beiseina leh min tehna a sang bik a, tun sorkar mekah hian buk lung han khai chhin ula, sorkar laka lungawi lo nia inhriatte chu mi mal hamthatna um an ni zel ang. A him chin leh a mawi chinah chuan party mite kan inhre ve ang; amaherawhchu, mi mal hamthatna duh lutuk avanga innawr vak vak hi a tha lo va. ZPM-in ram siam kan tum dan nen pawh a inpersan hle,” tiin ZPM chu an danglam tur a ni an tih kha a la ngai reng tih a sawi.
Chief minister chuan, “Party leh sorkar timualpho khawpa hnathawk chhia, ram hmangaihna nei lo, hlep hnem tum ringawt kan awm a nih chuan party atang pawhin kan inchawlhtir hreh dawn lo va. Sorkar hmasa atanga kan chhawm, hna chhia leh tlo lo tak tak buaipui ngai a awm teuh mai a, ZPM sorkar hnua thawh chu a tha bik tur a ni a, a danglam tur a ni,” a ti.
He hunah hian Aizawl South II bialtu MLA Lalchhuanthanga pawhin thu a sawi a. Chief minister hian an party zawm tharte a lawm lut bawk.