Mizoram Larsap Gen (Rtd) VK Singh chuan National Highways Infrastructure Development Corporation Limited (NHIDCL) hotute chu kawngpui tha leh tlo, hun tiam chhunga zo fel hman tura tan la tur leh tun lai thiamnate hmang tangkai turin a chah.
Zirtawpni tlai khan NHIDCL Regional Office, Aizawl Executive Director Virendra Kumar Jakhar leh a thawhpuite chuan Larsap Gen (Rtd) Singh chu Raj Bhavan-ah kawmin Mizoram chhunga NHIDCL hmalakna leh hmachhawpte an sawipui.
An inkawmnaah hian larsap chuan NHIDCL kaltlanga Mizorama kawngpui siamte chu Mizoram châk lakna pawimawh tak tak, ni tin khawsak phung thlenga nghawng thei a nih thu a sawi a. NHIDCL-te chu kawngpui tha leh tlo hun tiam chhunga zo fel hman tura tan la tur leh tunlai thiamnate hmang tangkai turin a chah a. A bik takin state pawn atanga mamawh lakluhna kawng pawimawh tak Silchar pawhtu kawngpui chu ngaipawimawh lehzual turin a chah bawk.
NHIDCL Regional Executive Director Virendra Kumar Jakhar pawhin Mizorama an hmalaknate larsap hi a hrilhfiah a. Mizoramah National Highway hna khawih km 1,523-a thui awm a, NHIDCL kutah km 921 awmin, km 602 chu PWD kutah a awm a. NHIDCL enkawl zinga km 547 chu zawh fel tawh niin km 221 thawh mek a ni a, hmalak lehna tur km 153 an neih thu a sawi.