Aizawl: Inrinni khan Prime Minister Narendra Modi chuan Survey of Villages & Mapping with Improvised Technology in Village Areas (SVAMITVA) Scheme kaltlangin India rama state 10 leh union territory pahniha in hmun neitu nuai 65 chuangte hnenah property card a sem chhuak a. Heng zingah hian Mizorama khaw 18 atanga property card 1,754 pawh an tel a. He hun hi Larsap Gen (Rtd) VK Singh chuan Raj Bhavan atangin biakhmuh theihna kaltlangin a telpui.
Larsap Gen (Rtd) Singh chuan Mizoram chu hmarchhak zinga property card sem chhuak hmasa ber a ni chu chhuanawm a tih thu sawiin Land Revenue & Settlement hotute chu SVAMITVA scheme hnuaia hmalaknate a hlawhtlin theih nana tan la chhunzawm zel turin a chah a. Mizoram atanga hamthatna dawngte a lawmpui thu a sawi a, duhsakna a hlan nghal bawk.
SVAMITVA scheme hi April 24, 2020 khan prime minister-in a hawng a, in hmun neitute tana revenue document felfai tak, drone survey leh GIS technology hmanga chhinchhiah thlapna a ni a. Bank loan lak nana dahkham bakah pawimawh dangahte pawh a hman theih a ni.
Hemi kalpui tur hian Mizoram sorkar leh Survey of India ten thawhhona thuthlung July 8, 2021 khan an ziak a. Revenue survey la tih lohna khuaahte December 9, 2021 atang khan drone survey tan niin, December 2, 2024 khan zawh fel a ni a, district pakuaa khua 319 ahte drone survey hi neih a ni.
Mizoram chu North Eastern Region zinga Property Card sem chhuak hmasa ber niin April 24, 2023 khan property card sem chhuah tan a ni a, tun dinhmunah Mizoramah Property Card 2,909 sem chhuah tawh a ni a. Ruahman dan chuan hemi hmalakna kaltlang hain Mizoramah Property Card 35,000 bawr vek pek chhuah tum a ni.
He hunah hian LR&S department Minister B. Lalchhanzova, Secretary Vanlalmawia, Addl. Secretary Lalhmunsanga Hnamte, Jt. Secretary V. Lalduhzuala, Director R. Lalthazuala leh official dangte pawh an tel.