Aizawl: Aizawl Wildlife Division chuan Aizawl Dawrpui venga sanghar thih chungchangah Inrinni khan Aizawl Police Station-ah FIR an theh lut.
Chawlhkar kalta Zirtawpni khan Aizawl Dawrpui venga hun eng emaw ti atanga sanghar awm thin chu thia chhar a ni a, mi kut tuar ngei nia a lan avangin sanghar thihna chungchanga a mawhphurtute man chhuah an nih theih nan Environment & Climate Change department hnuaia Aizawl Wildlife Division chuan FIR an theh lut a ni.
Thudawn danin sanghar ruang hi Zirtawpni zan khan Mercy Pet Care-ah endik a ni a. Post-mortem leh X-ray result atanga a lan danin a bawp leh dul nema hliam hnuhma hmuh a ni a, a luruh a khik bakah hliam dang neuh neuh a nei a. A pumpuiah engmah a pai lo va, chaw a ei lohna a rei deuh tawh niin a lang a. A ruang hi endik that leh a ngaih takin vawn that rih a ni.