Aizawl: Chief Minister Lalduhoma chuan department tinten an dinhmun an hriat chian a ngai a, a bik takin 2nd instalment nei chi hna an thawhte phei chu muangchan loh an duh tih a sawi.
Thawhtanni khan chief minister kaihhruaina hnuaiah department pahnih, Disaster Management & Rehabilitation (DM&R) leh Department of Personnnel & Administrative Reforms (DP&AR) te hnathawh thlir letna, review meeting chu Secretariat Conference Hall-ah an nei a. Chief minister chuan review meeting hi tum nga an buatsaih tawh a, department dang pawh neihpui zel an tum thu leh a tul angin neih nawn leh zel a nih tur thu a sawi.
Review meeting hi thil dik lo zawng tura buatsaih a nih loh thu sawiin Lalduhoma chuan, “Harsatna sutkian dan leh thawhho dan tha kan zawnna a ni. Zalen takin engkim kan sawi ang a, minute fel takin kan siam ang a, nakkinah kan la rawn umzui leh dawn a ni,” a ti.
Chief minister chuan aikal lak an titawp a, lo la awm ru palh an awm em tih pawh an enthla zel a. Officer pension tawhten sorkar facility an lo la kawl reng em tihte pawh an dap zel tih a sawi a. Hun vawn dik an duh a, khauh zawkin an kal a, an zawm tha tlang hle a, an kengkawh zui zel dawn tih a sawi a. Sorkar hnathawkte chu mipui tana dawr theihna hun tam zawk nei tur leh dawr nuam zawk ni tura an beisei thu a sawi.
Lalduhoma chuan department tinte hian an dinhmun, an pending project te, an leiba te, an hna kal meka an thlen chinte an hriat chian a ngai tih sawiin, “A bik takin 2nd instalment nei chi hna kan thawhte phei chu muangchan loh kan duh. UC theh luh ran a tul thin a, innghahkhawm a ngai thin bawk si a. Muang fal bik tumah awm lo se, hmasawnna hna hi thawk thuai thuai ila kan duh a ni,” a ti a. Department-ten project inang tak tak an theh lut thin a. Hetianga inhre tawn lo va hma an lak hian sum leh pai, hun leh tha, tul lovah a luan ral theih avangin an project siam reng reng planning department lama theh luh hmasak zel tur thu a sawi.
GST registration nei lo hnenah eng contract hna mah pek loh tur tih sawiin chief minister chuan, “Contract diltu chuan GST Registration an nei ngei tur a ni. Contract hna atangin chhiah tam tak a hmuh theih a, chân kan phal lo. Agreement tha tak nen chauh contract hna pek tawh tur a ni. Contractor lam chan tha sa ranin agreement hi kan ziak fo va. A phenah thil rinhlelhawm tak a lo awm duh viau lehnghal. A neitu, a pawisa tumtu sorkar hi a dawih zawkah kan tang fo va, hrem chakawm tak tak pawh kan hrem ngam loh phah. Hei hi tihtawp kan duh,” a ti.
He hunah hian department pahnih changtu, Minister K Sapdanga pawhin thu sawiin DP&AR chu sorkar marphu lai tak niah an inngai a, kalphung thar atana hmanraw pawimawh lai ber an ni a. An kal dan turah pawh thurawn tha dawng turin an inhawng zau hle, tiin, review meeting a neihpui avangin chief minister chungah lawmthu a sawi.