Israel chuan Hamas nena inremna an siam angin Hamas-in mi an hrensak pathum an chhuah hnuah Palestinian mi tang 90 chu Thawhtanni khan a chhuah ve ta a, thla 15 zet an indo hnu leh mi 47,000 chuang an thih hnuah silai puak chu a reh ta rih.
Hamas hian Pathianni khan October 7, 2023-a Israel an rûn tuma an man, Gaza-a an hren zui zinga mi pathum, hmeichhia vek chu a chhuah ta a. Hemi rulh let nan hian inremnaa an ziah angin Israel pawhin a lung ina Palestinian a tantir zinga mi 90 a chhuah ve a ni.
Inremna thawh khatna, ni 42 chhung kalpui tura tih hi Pathianni atang khan hman tan a ni a, hetih chhung hian Hamas chuan Israel chhim lam a rûn tuma a hren zui tak zinga mi 33 chu a pe let dawn a. Palestinian za tel chuan Israeli lung in an chhuahsan ve bawk ang.
Pathiannia Hamas-in a mi hren a chhuahte hi Emily Damari, Romi Gonen leh Doron Steinbrecher te an ni a, an nute theuh nen an inhmu tawh a. Israeli military pawhin nufa an intawng leh lai video hi a pho chhuak tawh nghe nghe.
Israeli Prime Minister Benjamin Netanyahu chuan ‘thimna hmun atangin an lo chhuak’ tiin a sawi a. “Romi, Doron leh Emily te hi ram pumin kan lo lawm a. In lo haw leh ta hi kan lawmpui tak zet a che u. Mi dangte pawh in zavaiin in inah in haw leh vek ang tih ka tiam a che u,” a ti bawk.
Inkahhai hi kalpui tan tura ruahman hmasak aia darkar thum dawna tlaiah kalpui tan a ni a. Tihkhawtlai a nih chhan hi Israeli Prime Minister Netanyahu-a’n Hamas hnenah hian an mi hren a chhuah turte hming pe tura a tih chu an pek mai loh vang a ni a. A hnuah Hamas hian a pe ta chauh a ni.
Hamas hian inkahhai puang tura inremna chu tihhlawhtlin ngei an duh thu leh mi hren chhuah turte hming chu ‘technical lama harsatna’ avangin an pe chhuak mai thei lo tih an sawi a. Netanyahu-a’n India huna chhun dar 12:00 thleng hun a pekah tlai dar 2:45-ah an pe chhuak thei chauh a ni.
October 7, 2023-a Hamas-in Israel an beih khan mi 1,210 an that a, civil mi deuh vek an ni a. Mi 251 chu Gaza-a hren turin an man zui a, an zinga 94 chu an la hreng a, heng mi hren mek zinga 34 hi chu an thi tawh niin Israeli sipaite chuan an hre nghe nghe.
Qatar leh United States palainaa rei tak an inbiak hnua inkahhai puang tura inremna an neih hi thawh thuma kalpui tur a ni a. A thawh hnihna atan hian thawh khatna kalpui tan atanga ni 16-na atangin an inbe zui dawn a, an inrem leh theih chuan mi hren dangte pawh an chhuah beisei a ni.
Thawh hnihna a zawhah thawh hnihna kalpui tur a ni ang a, hei hi chu Hamas beihna thungrulh nana Israel-in Gaza-a an awmna hmun a tihchhiatte tun din lehna tur a ni dawn a, hun pawh a duh rei rin a ni a. Israeli mi hren thite ruang lak kir a ni bawk ang.
Israel leh Hamas indonaah hian November, 2023 khan chawlhkar khat awh lek inkahhai puan a lo ni tawh a, hemi tum pawh hian an mi tang ve ve an lo inthleng tawn nual tawh bawk.
Hamas-in Israel a rûn kha an ram chanchina beihna an tawh len ber a ni a. Phuba lak nana anmahni chhut chimih tuma sipai chakna hmanga Gaza a beih letnaah Palestinian 47,000 chuang thiin mi 1,10,000 chuangin hliam an tuar bawk niin Hamas hnuaia health ministry chuan a sawi a. Mi maktaduai 2.3 vel, Gaza-a cheng zawng zawng deuhthaw chenna in leh lo nei lovin an awm phah bawk.