AZL: Mizoram Journalists’ Association (MJA) Gen. Hqrs chuan nimin khan Aizawl Press Club-ah kum thar atana Pathian hnena inhlan tharna neih pahin thingpui an in ho.
Inkhawmah hian MJA President C. Lalrambuatsaiha chuan, MJA member-te chu taimakna leh thawhrimna tel lovin eng kawngah mah a hlawhtlin theih loh tih hre thar turin a chah a. Khawvel changkang zelah internet-in a run mek a, social media leh hmasawnna hrang hrangin thuthar thehdarhtute chu nasa takin a tibuai a. An dinhmun chu derthawng taka a dah mek avangin hemi laka mahni inchhan chhuak tur leh talchhuak turin thawhrimna leh taimakna chu kawng awm chhun a ni tih an hriat a, theihtawp an chhuah a tul thu a sawi.
C. Lalrambuatsaiha chuan, khawvel chu a thiam leh titheite dinchhuahna, survival of the fittest a ni tih an hriat reng a tul a, dam khawchhuak tura theihtawp an chhuah loh chuan tuten emaw an hliahkhuh mai dawn avangin theihtawp chhuah zel turin a chah bawk.
Inkhawm hi MJA Treasurer Lalrinmawia Sailo-in a kaihruai a, General Secretary K. Zothanpara’n MJA chetvelna report pein, senior member Lalzamlova’n hunserha hmang a, MJA Secretary Samuel Lalruatsanga’n lawmthu sawiin, hun a khar.