Aizawl: MPCC President Lal Thanzara chuan tun dinhmunah Mizoram hi chhan tlakin la awm mah se, ZPM sorkar hian an term an hman zawh chuan ram hi a chhe dawn niin a sawi.
Nimin khan MPCC President Lal Thanzara ho vin Aizawl Municipal Corporation (AMC) huam chhunga Congress party local council member zawng zawngte chu Lal Thanhawla Auditorium, Congress Bhavan-ah an thukhawm a. He hunah Lal Thanzara chuan, Pathianin kohhran leh politics hi a rawngbawl nan, ram siamthat nana a pek a nih thu a sawi a. Village council leh local council tha neih a nih loh chuan ram tha a neih theih tak tak loh avangin an pawimawhna a sang em em tih a sawi a. Ram siam tha tur chuan politics leh kohhran tanrual a ngai a, village council level-ah, local council level-ah, chhungkaw tha an din phawt a ngai tih a sawi.
Lal Thanzara chuan, Mizoram hi chhan tlak la awm mah se, ZPM sorkar hian an term an hman zawh chuan ram hi a chhe dawn nia sawiin, “Sum leh pai an puk pawp pawp dante pawh kan hre vek a, eng vangin nge an puk an puk a ngaih? Central-a a chahbi kawltute khu he sorkar chungah an lawm viau lo a nih ka ring tlat. Chuti ni lo se chuan pawisa an puk an puk ngai lo hian an rawn enkawl theih ka ring tlat a ni,” a ti.
MPCC president chuan ZPM tana lai em em chu BJP zawmpui pangngai awm anga an inlan rual rualin, Mizo kohhran miten an thinhrik ang tih an hlau bawk si tih a sawi a. ZPM sorkar hian sawhthing lei a tum tan a, thingtlang kutthnathawktute beiseina tihlawhtlingin leisak thei hram se tih hi Congress party tena an duh dan a nih thu a sawi bawk.