India ram pum nghawngtu, doctor zirlai pawngsuala thattu chu court chuan dam chhung lung in tang turin a hrem ta.
Judge chuan thi tura ti tura phutna chu hnawl mah se Kolkata khawpuia damdawi ina mahni inpea thawk, kar liam taa thiam loh chantir tawh, Sanjay Roy-a hi a dam chhung lung ina awm turin a hrem ta a ni.
Roy-a hian tih sual a neih loh thu a la sawi reng a, an hremna chu court sang zawkah a thlen rin a ni.
A tuartu chhungkuate chuan khai hlum an duh a, hremna an pek chuan ‘a barakhaih hle’ tih an sawi.
“Kan dikna chanvo atan kan bei zel dawn a, kan chhui hna kan tawpsan dawn lo. Engpawh lo thleng se, dikna tun din nan kan bei zel dawn a ni,” tiin hmeichhe pa chuan AFP news agency hnenah a sawi a. Indian danah mipat hmeichhiatna lam hawia tuartute leh an chhungte hi an hming puanzar a phal lo.
Hremna a tawrh tur puan a nih hnu hian court tualah doctor eng emaw zat chuan lungawi lohna an lantir nghal a, thil thleng chhuina leh hremna pek chu an duhkhawp lo.
Nikum August thlaa Kolkata, West Bengal-a doctor zirlai thahna hian an state mai bakah ram pum a nghawng.
Kum 31 mi hi RG Kar Medical College & Hospital-a zan lam a duty hun a zawhah seminar hall-ah a mu a. A ruang hi a thianten a chanve chauh thawmhnaw inbel leh hliam na tak tuarin dawhsan bulah an chhar a ni.
A ruang endiknaah chuan hmeichhia hi nasa taka nawr beh a ni a, a hliam hnuhma atangin nasa takin a tang ve tih pawh a lang tih hmuh a ni.
He thil thleng hi India ram pumah duh lohna leh damdawi ina thawktu, a bikin hmeichhiate himna tha tawk lo avanga thinrimna a chawk chhuak a. Kolkata-ah phei chuan doctor-te chu chawlhkar eng emaw zat an nuar a, a titu hrem an phut bakah a chhuitute chuan an hna an thawk muang a, an titha tawk lo niin an sawi.
Roy-a hi thil thlen tukah man nghal a ni a. Sorkar laipui hnuaia chhuitute chuan court-a an thil hmuh an thehluhah rui chungin damdawi inah hian a kal a, hmeichhe doctor amah chauhva mu a hmuh chuan a chungah pawi a khawih ta mai niin an tar lang.
A chhuitu, Central Bureau of Investigation (CBI) hian Roy-a hi thi tura hrem an phut bawk.
Thawhtanni khan judge chuan hremna tur hi puangin finfiahna an hmuh zawng zawng thlirin pawikhawihna thleng chu ‘thil thleng ngai lo’ a nih bik loh thu a sawi.
A hremna tur a puan hma hian judge hian Roy-a hi court-a thu sawina hun a pe bawk a. Hetah hian engmah tihsual a neih loh thu leh a lakah dik lo taka ‘thil tih a ni’ tih a sawi.
Tute hming mah lam chhuak bik chuang lovin Roy-a hian he thilah hian ‘mi dang inrawlh an awm’ niin a sawi bawk.
Judge hian Roy-a thil sawi chu hnawlin court-in engkim, a titu chet dan hmuin thiam loh chantir a ni tawh tih a hrilh.
Politician thenkhat leh social media hmangtu tam tak pawhin hremna pek chu an sawisel.
West Bengal Chief Minister Mamata Banerjee pawhin court thupek chu a lungawina khawp a nih loh thu a sawi a, “Dikna kan duh a, hetiang pawikhawihtu hi chu khai hlum ngei tur a ni,” tiin thuthar lakhawmtute hnenah a sawi.