Canada zaithiam, ‘Call Me Maybe’ hla vanga hriatlar Carly Ray Jepsen chuan rin loh taka a lar chiam hnu khan music lam a tuina a hloh fai hman, a ti.
Kum 39-a upa hian September 2011 khan ‘Call Me Maybe’ hla hmangin rimawi khawvel a barakhaih thut a, amah ngei pawh a inring hman lo nasa hle a, larna leh hmingthanna buaipui dan turah ngaihdan mumal a neih miau loh avangin lar a zo lo hman hial nghe nghe.
Jepsen chuan, “He hla a chhuah hnu khan ka nun hi a phe deuh ruai nghal. Hmun tin maia min lo hre ta mai kha thil thar a ni a, pressure nasa tak min siam rualin, ka nun hman dan pawh a inher danglam thut. Fimkhur a ngai hle a, larnaa bo mai hi thil awl tak a ni. Mite’n i laka an beiseina ah che hian i pilbo daih thei. Ka hlimna a bo duak. Dawhsana in lan a, zai te hi ka hlim dan chu a ni a, a hnu-ah erawh mawhphurhna leh tihtur a nih vang maia zai ka ang,” tiin a nun thil thleng a sawi.
Kum thum dawn a talbuai hman a, thil kal dan fuh lohna leh dik lohna zawng chhovin, a tuinaa inchiah leh turin hmathar a lak a ngaih phah. “Emotion album (2015) buaipui tur khan hun rei tak ka hmang a, rimawi nena inzawmna leh inlaichinna thuk tak nei leh tur khan ka bei nasa,” a ti.