- K. Hmingthankaia
Fak phu hi chu chawplehchilh emaw, a hun lai, an dam lai ngei hian fak mai ila, an tan malsawmna, hlimna leh lawmna thlentu, hriselna leh dam reina a lo ni ang a, rilru hrisel lehzual lo neiin, midang tan malsawmna an lo ni lehzual thin mai dawn a ni. Chutiang bawkin sawisel ngai pawh a hlimchhawn leh a hun lai ngei hian, a point takah sawisel fak zel ila, insiamtha duh leh sim duha mual mual an lo awm ang a, kan ziaawm chho zel mai dawn a ni.
Thil sawisel hi hreh miah loh tur. Kan mit leh beng leh rilru hian thil engkim hi a thliar thiam vek a. Thil tihawm leh awm lohte, mawi leh mawilote, dik leh diklote, fel leh fellote, tha leh thalote kan hre vek a ni. Chutianga sawisel ngai kan hmuha sawisel leh si lova kan inen liam leh mai mai zel si chuan, kan ram tereuhte hi kawng engkimah diklohna lam hlir leh thil thalo lam hlir lalna leh chak zawkna hmun, ram hreawm leh hmuhsitawm, ram nuihzatthlak chenna atana itawm loh ram kan ni thuai mai ang. A thalo lam hi chu intihhmuh a nuamin a pung chak si a. Tuna kan awm dan pawh hi a hmuchiangtu tan chuan a manganthlak tawh a nih hi. Sawisel ngai chu hlau miah lovin sawisel ila, fak phu chu phur takin fak zel mai thin bawk ila. Tichuan kan insiamtha tawn zel dawn nia.
Tuna ka fak tur pawh hi midang pawhin fak phu an ti ve theuhin ka ring. Tawngka leh ziak pawhin an lo fak tawh mai thei, mahse, ka mit leh beng hian a la hriat ve loh bakah, hman atanga fak ka duh tawh a nih avangin tunah hian ka fak dawn a ni.
Aizawl Civil Hospital hi mamawhna avangin ka pan zing ta hle mai. Mipui pan khawm ber leh, hmuntin atanga miretheiten mangang taka an pan ber a nih vang leh, kan ram darthlang, kan nunzia pho langtu a nih bawk avang hian, thil awmdan engkim leh hnathawktute hi ka theih chin chinah ka chik ru hle thin. Lungawilohna leh sawisel tur pawh ka hmu teuh, mahse, chulam chu tunah ka sawi dawn lo.
Aizawl Civil Hospital-ah hian Medicine department hi mi chitinrengin kan pan nasat ber a ni ang. Hmuntin ramtin atangin hnamtin chitin, mirethei ber leh mawlmang ber thlengin, khawimawlai kawmkar leh daitam atanga lo kal mirethei bakberh ber thlengin nitin kan thu nghuk thin a nih hi. Chutiang zozai mihring lo dawngsawnga, lo buaipuitu, an awmdan tur lo ruahmana lo remfel zung zung thintu Mapuii, Zohmingliani, Republic Veng hi a va fakawm rei tawh tak em!!
Mi chitinin lehkha an rawn ken chu a lo ensak zung zunga, an awmdan tur leh Doctor an hmuh turte chu a lo thliarsak zung zung thin. Mi tupawhin thil engpawh an zawh apiang leh an biakna apiang chu fel takin a hrilh zung zunga, inchhung lam, Doctor awmna lam leh pawn lam mipui lam chu a enfel zung zung renga, chak taka hna a kal theih nan leh, mipui luh nghakhlel takte chu an luh thuai theih nan a remfel thuai thuai thin a ni. Mipui lut tur chu a indawtin, fiah tak leh ring takin a lam lauh lauh thin. Sawtiang mipui tamna leh rik mur murnaah chuan, beng thalo leh thil sawi man mai theilo engemawzat kan awm ang tih chu Mapuii hian a hria a ni. Tute emaw angin zawite, tawite leh chhumbung hmukin thil a sawi ve ngai lo. Chumai a ni lo, kum upa lam leh naupang/naute lam chu an lehkha atangin a lo thliar hrang thlapa, mi hnung deuha lo kal pawh nise, midangin an thik loh nan, ” Tunah upa lam leh naupang lam kan lam leh phawt ang.” a ti thlap thlap thinte saw a va han fakawm em!!
Lehkha thehluh hnu hian thil dang ti turin kan kal bo fo thin. Kan hming an lo lam tawh angem le tiin kan buai ru fo thin. Chu’ng mite rilru tur chu Mapuii chuan a hrethiam tlat. ” Tunah hming lam laia awmlote kan lam leh phawt ang.” a khat tawka a ti leh thin te saw a va tha tak em!! Tunah serial number chuti zatna kan lam mek tihna chang a hria te saw. Mipui pawhin lehkha kan thehluh rualin no. engzatna nge ka nih, tih hriat zel a tha. Zawh nghal zel tur. Doctor lo kal belh an awmin mipui a kawhhmuh zung zung thin te saw. Mahse, thil pakhat, ‘ Damlo kalpuitu leh na ngawih ngawih nilo chuan upa lam thutna ken hram hram nise’ han ti tel zeuh thin se ka lo ti deuh a. A lo ti thin a, a ti lai ka nang fuh lo pawh a ni thei bawk.
Sawtiang em ema mahni hna tlin leh inpe zo, mahni mihringpuite tana tihtakzeta inpe zo saw chu i fak mawlh mawlh ang u. Damlohna lam a ni kher lehnghal si a. Nikhat thil thu leh phur thut vanga ti pawh a ni hek lo. Kum engemawzat chu nitin a tihdan a ni tawh. Fak beiseia ti pawh a ni lo tih chu a chezia en sawn a chiang reng a ni. A hnaah leh a mihringpuite tan thinlung leh tih tak zetin a inpe tih hairual a ni lo. Inentir tur nau pawm puih ngai em em te chu, hna thawk chungin an naute a lo pawm sak lawp lawp bawk thin. Thingpui ni se, hnathawk chung, ding chung leh kal chungin a in mai a, a va fakawm em!! An deptt. pawh hian a hna thawh dan hi an hriain an fak ve ngeiin ka ring a. Mahse, tawngka ngawt loa fak leh chawimawi a phu ka ti a ni. Ka fak seng lo ang. A thil tih dan ringawta fak phu a ni lo, a thinlunga sawtiang tih duhna lo chhuak saw a hlu leh ropui ber lai chu a ni.
Sawrkar hian a hna thawktu tupawh hi, mahni hna thiam bela, thiam belh zel tur leh, tih dan tha zawk leh hmasawnna tha zawk hmuchhuak zela, efficiency and improvement nei zel turin a beisei a ni. Mahse, chuti lama ngaihtuahna seng duh miah lo, tluangtlam pangngai ve tak satliaha nikhat nilena, thlakhat hmanrala hlawh ngai lak leh mai tum chauh hi a tam zawk kan nih hmel.
Mapuii hnaah hian kaisanna tur, promotion category a awm lo. A hna hian mawhphurhna lian tak pawh a nei hran lo. Chuvangin a hna hi rilru seng vak lo leh tluangtlam pangai, sawsel tawk lovin a nilen pui thei reng. Mahse, Mapuii chuan chutiang chu Pathian leh Sawrkar leh kan mihringpuite hian kan laka an beisei a ni lo tih a hria a ni.
Hna thawh inang leh hlawh lak inang hian nitin, kartin, thlatin hi pension thlengin hun a hmanral theih a. Mahse, kan rilru put hmangte, kan thawh dante, kan hnaa kan inpek dante, min dawrtute chunga kan awmdante, kan tawngkamte, kan hun hmanral dante chu a inang lo hlawm hle a nih hi. Kan damchhung tawiteah hian mite thinlungah mahni leh mahni hian mark kan insiam theuh si a.
Zohmingliani, Mapuii, Republic Veng, Aizawl Civil Hospital Medicine department-a Group D hna thawk ang theuh hian mahni hna theuhah leh mahni mihringpuite chunga kan rilru put dan ni theuh thei sela chuan, Zoramthar hran a ngai lo ni mai tur.