Aizawl: Thawhlehni khan Mizoram People Forum (MPF) General Headquarters, Governing Board chuan Synod Committee Room 1-ah president charge inhlanna an nei a, VC leh LC inthlan tur an thlir lawk bawk.
President kalchhuak Rev. R Vanlalnghaka chuan President thlan thar Rev. R.C. Lalnghakliana hnenah charge a hlan a. MPF khawmpuiin MPF Dan Pui a lo tih danglam tawh angin, Governing Board Committee chuan meeting hmasa lamah Rev. R.C Lalnghakliana chu lungrual takin a lo thlang tawh a ni.
Governing board thukhawm chuan local council leh village council inthlan thuchah print leh electronic media lamah tihchhuah a rel a. He inthlan tur hmalakna chungchangah Rev Lalramliana Pachuau, General Secretary chuan Constituency leh District forum-ah te hmalakna tur kaihhruaina thawn chhuah a nih tawh thu report a pe bawk.