Vairengte leh Sairang inkar kawngpui (NH54) chhia avanga bungraw phurtu truck enkawltuten naktuk atangin an lirtheite dintir dawn mah se, tuialhthei phurtu lirthei liante erawh dan pangngaiin an tlan dawn.
All Mizoram Petroleum Dealers’ Association (AMPEDA) President K Lalnghakliana chuan Mizoram Truck Owners’ Association (MTOA) leh Mizoram Truck Drivers’ Association (MTDA)-in Vairengte leh Sairang inkar kawngpui chhia siam a nih hma chu tlan loh an tum chu an zawm dawn lo a, tuialhthei phurtute dan pangngaiin an tlan reng dawn avangin mipui tan chiaina tur a awm lo tih a sawi.
Tar lan tawh angin Thawhtanni khan MTOA leh MTDA chuan joint meeting neiin Mizoram châk lakna kawng, Vairengte leh Sairang inkar chu a chhiat avangin tun dinhmunah kawng chhia avangin an truck-te a chhe nasa em em a. A khalhtute nunna atan pawha hlauhawm tak hial avangin naktuk atangin an tlan ngam dawn lo va. Truck tlan ngama kawng hi siam a nih hma chuan Mizoram chhungah bungraw phur truck engmah a tlan dawn lo tih sawiin, eibar leh ni tin mamawhah harsatna an tawk a nih chuan mipuite hriatthiam an ngen a ni.
Hetih lai hian nimina PWD thuchhuak chuan January 20, 2025 atang khan Vairengte leh Sairang inkar kawngpui (NH54) chu war-footing-in siam that hna an kalpui a. Hei hian WBM material-a pothole repair leh sidedrain repair pawh a huam a. He hna thawk tur hian labour 20 rual chu Mega Food Park-ah riak lutin labour camp dangte pawh Khamrang-Selesih peng bulah siam zawh tawh a ni.
Khamrang thlen hma, Tuitun lei bul leh Rengtekawn area-ah te hna hi thawh tan nghal niin, heng hna thawh nan hian JCB, vibratory roller leh tipperte chu a hmunah dah tel tih an tar lang.
PWD thuchhuah chuan Vairengte leh Sairang inkar kawng hi MoRTH-chuan NHIDCL enkawl turin gazette-ah chhuah tawh mah se PWD-in ongoing project pahnih – (i) Bilkhawthlir to Kolasib leh (ii) Kawnpui to Khamrangte la changin, a bak chu NHIDCL kutah a hlan tawh a. NHIDCL chuan heng kawngte hi December thla tawp/January thla tir lama an kuta la fel tur angin insawi mah se, an remchang leh ta lo va. PWD tan enkawl chhunzawmna tur sum sanction MoRTH atanga dil chhuah theih a nih tak loh avang leh NHIDCL chu sanction thar dil theitu zawk an nih tawh avangin an kutah hian hlan fel tum a ni a. Maintenance pawh NHIDCL tih chhunzawm tur ni mah se, an remchan leh tak loh avang hian PWD chuan pothole fill-na tur sum sanction chu sorkarah dil leh mekin, hemi hmachhuan hian hma an la nghal mek niin an tar lang bawk.