Aizawl: Village council inthlan tur kaihhnawiah social media-a thu dik lo thehdarh a nih chungchangah State Election Commission, Mizoram (SEC) chuan district pakuaa Suprintendent of Police (SP)-te chu a vawrh darhtu chhuichhuaka hma la turin a hriattir.
Nimina thuchhuah an siamah SEC chuan tun hnaiah village council inthlan turah thil pawi thei, VC candidate qualification chungchangah social media platform hrang hrangah thu dik lo vawrh darh a ni a. Thu dik lo vawrh darhtute hian, ‘Village council term chu February 19-ah a tawp tawh dawn a, khaw tina VC dingtu candidate-te pawh an inpuahchah nasa khawp ang le. Amaherawhchu, mipuiin kan hriat ve hrim hrim atan tar lang lawk ila. BPL & AAY dawng bikho sorkarin mi retheia chhiar telte chhungkuate chu VC-ah an ding thei dawn lo tih hriat a tha ang, ding an awm a nih chuan complain-te a awm palh a nih chuan election commission-in an cancel-sak thei ang’ tiin an ziak a. Hei hi SEC chuan an ngai thu tak hle tih sawiin, Thawhtanni khan district pakua – Aizawl, Lunglei, Serchip, Champhai, Mamit, Kolasib, Saitual, Khawzawl leh Hnahthial-a SP te chu he thu dik lo vawrh darh chungchangah hma laa thu dik lo vawrh darhtu chhuichhuak turin a hriattir a ni.
SEC chuan chuan February 12, 2025-a VC inthlanna neih turah hian Lushai Hills District (Village Councils) Act, 1953 leh Mizoram (Election to Village Councils) Rules, 2014-in a sawi bak VC chuh tura qualification neih ngai hriattirna dang chhuah a nih loh thu an sawi bawk.