AZL: Food, Civil Supplies & Consumer Affairs Department chuan hmun thenkhata January, 2025 ration buhfai sem chhuah theih loha awm mek chhan an sawi fiah.
Nimina an thuchhuah an tar lan danin, hmun thenkhatah semchhuah theihloh in a awm mek chhan chu National Informatic Centre (NIC) lamah technical problem a awm vang a ni a. He harsatna thlen chhan hi tun hmain Ration Card Management System (RCMS) a district pathum Saitual, Khawzawl leh Hnahthial te dah hran loh an ni a, January 2025 atang hian heng district pathum te hi anmahni district a an inrelbawl theih nan dah hran tan an ni.
Hei vang hian buhfai sem nana hman ber ration pekna portal-ah buaina awmin, ePos khawl (kutzungpui nemna)-ah harsatna a awm phah bawk a. Hemi chingfel tur hian a enkawltu NIC, Hyderabad-a an hotute leh FCS&CA Department hotute nen inbiakpawh reng a ni. Tunah hian a tam zawk siamfel tawh a ni a, buhfai pawh hmun tam takah semchhuah mek a ni. He harsatna hi chinfel thuai a nih dawn avangin mipui lo chiai lo turin hriattir tih an tar lang bawk.