Liverpool leh Barcelona chuan Champions League knockout stage an lut tawh a; Manchester City chu tla thei dinhmunah an ding mek a, Arsenal leh Aston Villa erawh dinhmun himah an awm rih mek.
Celtic-in play-off tal thlen phak inbeiseina an neih laiin team 36 telna league phase chuan a vawrtawp a thleng mek.
Tar lan tawh thin angin a sang pariatin knock-out stage hmasa ber an lut dawn a, pakuana atanga 24-na inkarten hmun riat dang la awm inchuhin play-off round an khel zui ang.
Kum 2023 champion, City chu buk rit zinga beisei anga la khel chhuak lo zingah an tel a. Nilaini zanah inlanin an result azirin beiseina sang zawk la nei thei erawh an ni.
Liverpool leh Barcelona chu Thawhlehni zana hnehna an chan leh hnuah khelh khat la hmabak chungin knockout stage an lut a, a lut hmasa ber pahnih an ni ta.
Arne Slot-a kaihhruai team hian French club Lille chu Anfield-ah hnehin tun season-a an khelh tawh vawi sarihah hnehna an la chang vek.
He result avang hian Reds hi khelh hmabakah chak lo mah se a sang pahnihah an tel dawn tih a chiang a, knockout draw-ah pawh top seed an nih theih phah bawk ang.
Thawhlehni zana Benfica khelmuala 5-4-a chak, Barcelona pawhin a sang pariat zinga tel turin an dinhmun an hlang kai a. Nilaini zana team dang inkhel leh karleha khelh hmabak an la neih result azirin Spanish club hi an dinhmun tur a chiang ang.
Arsenal leh Villa pawhin a chhe berah play-off tal chu an thlen a rinawm a, a sang pariatah an tel phak lo a nih pawhin knock-out stage luhna hun remchang an nei dawn tihna a ni.
Gunners hian he chanchin ziah lai thleng hian inkhel pahnih an la nei a, Nilaini zanah Dinamo Zagreb an mikhual a. Anmahni leh mi dang result azirin Mikel Arteta-a team hi a sang pariata tel tur an nih leh nih loh nemngheh theih a ni.
Villa hian Thawhlehni zan khan Monaco chu 1-0-in an hneh lo hlauh va; mahse, khelh hnuhnung bera Celtic an hmachhawn hma chuan a sang pariatah an la tel ve rih.
Celtic hi 23-na niin tla thei dinhmun sang ber aiin dinhmun pahnihin an sang.
Brendan Rodgers-a team hian Nilaini zan khan Celtic Park-ah a hniam ber, point pawh la hmu lo, Young Boys an mikhual a. An chak a nih chuan play-off khelh thei dinhmun an lut thuak thei.
Manchester City hian point khata Celtic phak lovin 24-na an ni.
Pep Guardiola-a team hian Nilaini zan khan Paris St-Germain an tlawh a, Club Brugge la mikhual an hmabak bawk.
PSG lakah hnehna an chang haw thei a nih chuan play-off khel thei an ni nghal dawn a; mahse, thil awlsam a ni lo.
League phase inkhel hnuhnung ber hi January 29-a khelh tur a ni a, a rualin inkhel 18 a awm dawn a ni.
Tun season hi kalphung thara khelh vawi khatna a nih avangin a sang pariata tel phak tura point mamawh zat sawi thiam a har.
Season tan hma khan Opta chuan point 16 hmuh tlin (inkhel vawi riat awmah vawi nga chak leh vawi khat hnehtawk) chuan a sang pariata tel theihna hi 98% a awm niin an ngai.
Vawi nga an khelh tlin hnuah erawh Opta vek hian point 16 hmu chunga tlang theihna hi 87% chauh niin a tar lang tawh thung.
Point 10 hmuh (vawi thum chak leh vawi khat hneh tawk) chuan playoff khel tura a sang 24 zinga tel theih turah an ngai bawk.
Hetih lai hian point riat chauh hmuh chuan tun season-a Europe inelnaa inlan zuina tur awm tawh lovah an ngai thung.