February 5-a Delhi assembly inthlan turah chuh tur mi 699 an awm a, an zinga 96 chu hmeichhia an ni a. Party tinin hmeichhiate chu vote thlak ngei turin an sawm hlawm.
Kum nga kal taa inthlanah khan chuhtu 672 zinga 76 chu hmeichhia niin an pung hret a ni.
Political party lian pathum zingah BJP leh AAP chuan hmeichhia pakua ve ve dintirin Congress-in pasarih an dintir ve thung a. Party pathumte hian kum 2020 assembly inthlana hmeichhia an dintir aia tam vek an dintir.
Inthlan chuhtu hmeichhe zingah hian AAP atangin Chief Minister Atishi, Pooja Balyan, Pramila Tokas leh Rakhi Bidlani te an tel a. Atishi-i bakah hian Bidlani, Tokas, Dhanwanti Chandela, Bandana Kumar leh Sarita Singh te chu an ding nawn leh.
AAP-in a hmaa an la dintir loh hmeichhia an dintir chu Anjana Parcha leh MLA Naresh Balyan-a nupui, Balyan-i te an ni a, ani hi Uttam Nagar-ah a chuh a. A pasal hi tun hnai lawk khan gangster Kapil Sangwan nen inzawmna neiha puh a nih avangin man a ni nghe nghe.
BJP-in hmeichhia an dintir zingah hian hriat hlawh sa – Rekha Gupta, Poonam Sharma, Shikha Rai leh Priyanka Gautam te an tel a. Congress-in hmeichhe pasarih a dintir zinga hriat hlawh deuh chu Alka Lamba, Ariba Khan, Ragini Nayak leh Aruna Kumari te an ni.
Inthlan chuh tum hian January 10 atang khan hming pek luh theih niin mi 981-in an hming an pe a, Inrinni khan endik niin Thawhtanni thleng inhnuhdawhna hun hawn a ni a, inthlan chuh tak tak tur hi mi 699 an ni ta a ni.
Delhi-ah hian February 5-a vote an thlak hnuah February 8-ah chhiar a ni ang.