Aizawl: MNF party chuan Vairengte leh Sairang inkar kawng chhia siam thaa truck tlan ngamna turin sorkarin siam tha thuai turin an phut.
Nimina an thuchhuahah MNF chuan January 23, 2025 atanga Mizoram Truck Owners’ Association (MTOA) leh Mizoram Truck Drivers’ Association (MTDA) ten Mizoram ei leh bar chawkluhna kawngpui ber, Vairengte leh Sairang inkar kawng chhiat lutuk avanga an tlan ngam tawh loh tur thu chhuah an siam ta mai hi lungchhiatthlak an tih thu tar langin, “Mizoram sorkar inthlahdah vangah ngaiin, sorkar chu a rang thei ang bera kawng chhiate siamtha thuai turin kan phut,” an ti.
MNF chuan PWD minister berin kawng siamna tura pawisa awm thu a sawi reng lai te, kha leh chen ruahtui tlak loh leh khaw that hun pawha he lai kawng hi siam that tum si lo, January 20, 2025 atang chauha Vairengte leh Sairang inkar kawng siam tha tura Mizoram PWD-in hma a la tan ve chauh hi sorkar inthlahdah lutuk avanga che tlaiah an ngaih thu tar langin, PWD minister chu chak taka hma laa kawng chhe laite siam tha nghal zung zung turin an phut.
“Kawng siamna tura tuialhthei man uchuak taka chhiah an tihpunna sum tlingkhawm pawh a hmanna tur dik tak, truck tlan ngamna tura kawng siam that nana hmang nghal turin Chief Minister Pu Lalduhoma kaihruai sorkar kan ngen a. An insawi ang ngeia mahni inhaivur hmasa lova ram tan hnathawk hmasa turin kan chah nghal bawk,” an ti.