Mizo rocker chuai thei lo F Sanglura chuan, a band nena an siam ‘Phungpuinu’ music video chu thawhlehni zan khan a tichhuak ta.
‘Phungpuinu’ hi Mizo rock/metal/thrash lam hawi a ni. A hla thu leh a music pawh a inhmeh hle a. He hla hi Mizo thawnthu, Chhura leh Nahaia te buh ven chanchin bakah, Dr Chhurbura leh Mawngping khaw ho thawnthu atanga siam a ni.
Nikum November thla khan ‘Phungpuinu’ track leh recording zawh fel a ni. Mahse, kum thar lamah music video hi buaipui a ni thung. A lyrics leh a thluk te siam fel anih hnuah, Mizo rimawi khawvela tawnhriat ngah ber pawl, Thangbawiha (guitarist) nen a ‘riff’ kal dan tur te an en dun hnuah, EME-ah an record a ni.
‘Phungpuinu’ hla a siam chhan sawiin F Sanglura chuan, “Mizo thalai, kan tu leh fate’n Mizo thawnthu an hre tawh lo mang lo va; chuvang chuan, rock music-in ka siam a ni,” a ti.
A sawi zel a, “Tunlai kan thalai chang lo pawh, kan tu leh fa te hian kan thawnthute hi chhiar leh ngaihnawm an ti lo riau a, hriat pawh an hre tawh mang lo hian ka hria. Tunlai khawvel Youtube leh games etc., te hian an inawi tlei ta ber hian ka hria a. Kan hmanlai Mizo thawnthu (story) atangte hian hla siam ila, rimawi hmang hian han phochhuak leh ila, naupang te paw’n chhiar leh ngaihthlak an chak leh hian ka ring,” a ti bawk.