Aizawl: MPCC Treasurer Dr Lalmalsawma Nghaka chuan village/local council inthlan lo awm turah hmun hrang hrangah opposition lamin candidate tura an mi sawmten sorkar lai lam atanga invauna titih an tawk thin chu vanduaithlak a tih thu sawiin, thleng tawh ngai lo se a duh thu a sawi.
Nimin khan Aizawl Municipal Corporation (AMC) huam chhunga local council inthlanna lo awm turah Congress party-in Venghnuai, Republic Veng, Dam Veng, Chaltlang leh Vaivakawna an cadidate turte chu MPCC Treasurer Dr Lalmalsawma Nghaka hian a puang.
Heng venga Congress party candidate turte a puannaah MPCC treasurer chuan thu sawiin, local/village council hi grass root politics tak tak thleng pha, mipuite nen a inhne hnai ber an nih avang hian an mawhphurna a sang hle tih a sawi a. Veng chhung inrelbawlnaah hian mi tin chungah intluktlanna leh rorelna rualkhai ramin a mamawh tawh hle tih sawiin, Congress ticket atanga VC/LC chuh tur an candidate-te chu rolrelna dik leh rualkhai keng kawh tura rilru paukhauh leh huaisen pu a chah.
Dr Lalmalsawma Nghaka chuan, “Khawtlang tana mi tha ni tura kan ngaih kan sawmte zingah an chhungte, an nupui/pasal, an fate, sorkar hnathawk awmnaah ruling party lamin invauna anga ngaih theih thu an chhakchhuah hriat tur a thleng fo a, he kalphung thar an tihah hian mihring zalenna democracy palzutna a awm hiala ngaih theihin thil a thleng mek a ni,” tiin, VC/LC inthlan lo awm turah opposition lamin candidate tura an mi sawmte zingah ruling lam atanga invauna titih an tawk thin chu vanduaithlak a tih thu leh, thleng tawh ngai lo se a duh thu a sawi.