Yemen-a Houthi movement chuan bungraw phur lawng, Galaxy Leader-a thawktu an hrente an chhuah ta tih an puang a. Lawnga thawkte hi Gaza indo kaihhnawiha Red Sea-a lawng kal an beih tan tirh lam, November, 2023 atanga an hren tawh kha a ni.
Houthi enkawl, Al Masirah TV chuan Bahamas flag intar, Japanese-in an enkawl lawnga thawk mi 25 hi Bulgaria, Ukraine, Philippines, Mexico leh Romania ram mite niin Oman kutah an hlan tih a puang.
Houthi Supreme Council chuan an mi hren an chhuah hi Hamas leh Israel ten Pathianni atanga kalpui tan ‘Gaza-a an indonaah inkahhai inremna an puan’ an thlawpna lantir nan an ti tih an sawi.
UN hnuaia International Maritime Organization chief pawhin lawnga thawkte chhuah an ni hi ‘rilru hahdamna hun’ a nih thu a sawi.
Galaxy Leader enkawltu, NYK Line chuan an lawnga thawkte chhuah an ni tih hi finfiah tuma an beih mek thu an sawi a, “A dik a nih chuan kan tan chuan thu lawmawm tak a ni dawn a, an chhungte hnenah thlamuangin an haw thei dawn a ni,” a ti.
Yemen hmarthlang lam thununtu, Houthi-te hian October, 2023 atanga Gaza-a Israel leh Hamas inkara indona a chhuah tan hnu lawkah khan Israel leh ram dang lawngte hi an bei tan.
US leh UK chuan Red Sea chhim lam leh Gulf of Aden-a sumdawng lawng eng emaw zat beih an nih avang hian Yemen-a Houthi-te chu thlawhna atangin an kap nghe nghe.
Israel pawhin Yemen atanga an rama beih a nih avangin nikum July thla atang khan Houthi-te hi thlawhna hmangin tum li an kap tawh bawk a. Houthi hian Israel hi missile leh drone 400 elin an kap a, a tam zawk chu pawi a khawih hmain kah thlak a ni tih sipaite chuan an sawi.