Manchester City chuan Egypt forward Omar Marmoush chu Eintracht Frankfurt atangin Euro maktaduai 70-in an la lut ta.
Kum 25 mi hian June, 2029 thleng daih contract a ziak a, a man hi £ maktaduai 4-a pung thei a ni.
Marmoush hian tun season Bundesliga-ah vawi 17 inlanah goal 15 a thun tawh a, England captain Harry Kane-a’n Bayern Munich tana goal 16 a thun chiah a phak lo.
“Kum 10 liam ta chhung khan Manchester City hi khawvela club lian ber zinga mi a ni a, chu chu phat buai pawh a ngai lo,” a ti.
“An aiawha ka khel thei tur hi ka tan leh ka chhungte tan pawh chakawm leh inchhuanna tham a ni a. Min tihlim a, ka lo suangtuah thin a taka a chang ta hian min tihlim hle a. Season hnih liam ta kha ka tan a ropui hle a, tunah hian bul tanna thar a ni dawn thung a ni,” a ti.
City hian kum 19 mi, Brazilian defender Vitor Reis chu Palmeiras atangin £ maktduai 30 leh Uzbekistan defender Abdukodir Khusanov chu Lens atangin £ maktaduai 34-in January bazar chhung hian an la lut tawh bawk.
Marmoush-a hi striker a ni a, No. 10 leh winger a ni bawk.
City director of football Txiki Begiristain chuan Marmoush-a hi ‘tlan chak leh inven dan hria’ niin a sawi a, kawng hrang hranga hman theih a ni chu ‘a tihlutu’ a nih thu a sawi bawk.
Marmoush-a hian Egyptian Premier League-ah Wadi Degla atangin bul a tan a, kum 2020 khan VfL Wolfsburg-in an la lut.
FC St Pauli leh VfB Stuttgart-a loan-a a khelh hnuah kum 2023 khan Frankfurt-ah hralh a ni a, vawi 67 a khelhsak tawhah goal 37 a thun tawh a, a thiante tan goal 20 a siamsak tawh bawk.
Milan panin captain Walker-a a kal ve thung
Manchester City hian an captain, Kyle Walker chu Italian club AC Milan-ah tun season chhung khel turin loan-in an chhuah ve thung.
Inremna an siamah defender hian loan-a a khelh hun tur a tawpah nipuiah a ngheta lak luh theihna tur pawh a tel.
Walker hian City tan vawi 316 a khel tawh a, medical thila tihfel ngai tifel turin Italy a pan thuai dawn.
Full-back hi City tana a inlan hnuhnung ber chu January 4-a West Ham an hmachhawn kha niin hemi hnuah hian manager Pep Guardiola hnenah ram pawn lama chhuahna remchang a awm chuan a duh thu a thlen zui.
Kum 34 mi hian an sawi zawm nasat tak, Saudi Pro League-a kal ai chuan Italy-a kal a duh zawk a ni.
AC Milan hi Manchester United forward Marcus Rashford nen pawh sawi zawm an ni mek a; mahse, Italy-a dan an kalpui mekah tun bazar chhung hi chuan UK-a khel player pakhat chiah an la lut thei thung.
Walker-a hi Guardiola-a kaihhruaia Premier League-a vawi ruk an champion-ah a tel vek a, Tottenham atanga kum 2017-a £ maktaduai 50-a an lak luh kha a ni.
Right-back hi England tan pawh vawi 93 lai khel tawh niin kum 2023 khan City captain pakhatah a tang tan a ni.
2023-24 season tan dawn khan an khelhpuiten anmahni hruaitu tur player panga an thlan chhuah zingah a tel a ni.
City hian January bazar inhawng mekah hian player thar pathum lak luh nan £ maktaduai 123 an hmang leh tawh a ni.