Aizawl: PWD Minister Vanlalhlana chuan Vairengte atanga Sairang inkar kawng, National Highway NH-6 chu NHIDCL kuta awm a nih thu sawiin Mizoram state sorkarin a enkawl lailawk niin a sawi.
Ningani khan PWD Minister Vanlalhlana hian Kawnpui leh Khamrang inkar kawng, NH-6 thawm that mek a tlawh a. Mizoram ei leh bar lak luhna kawngpui, Vairengte atanga Sairang inkar NH-6 chu NHIDCL kuta awm niin, eng emaw hna laklawhna avangin Mizoram sorkarin mipui mamawhna hriaiin a enkawl lailawk niin a sawi.
Mizoram sorkarin a enkawl hnu hian a thawh khat nan he kawngpui thawm that nan nikum lam khan Rs nuai 75 sen a lo ni tawh tih sawiin minister chuan, “Nikum vek, December 25, 2024-a NHIDCL kuta awm leh tura ruahman a nih laiin, NHIDCL hian an lak tak si loh avangin Mizoram sorkar chuan state pawisa a remchang ang ang pawt khawmin vawiin ni thleng hian mipuite mamawhna hriain a enkawl chhunzawm leh rih ta a ni,” a ti.
Vanlalhlana chuan NH-6 thawm that hna hi January 20, 2025 atang khan a tum hnih nan thawh tan leh a ni a, tun tumah hian Rs nuai 125 ruahman niin February 15, 2025-a siam zawh tum a ni a, sum ruahman sa hian a daih hmel loh avangin sorkarah dil belh leh mek a ni a, ngawrh taka siam mek a nih thu a sawi.
Minister chuan, “Mipuite harsatna kan hria a, a chhawk zangkhai turin Mizoram PWD kawng enkawl ni miah loah mawhphurhna kan la a. Chuvangin, mipui leh lirthei neitute pawhin sorkar thahnemngaihna min hriathiampui thin se kan duh hle a. Ni tina kan mamawh kan phurh luhna kawng hi mipuiten kan dim thiam a tul takzet a, a tichhetu ni loa dimdawi taka enkawltu kan nih theuh ka beisei a ni,” a ti bawk.