Aizawl: BJP Mizoram chuan Inrinni khan Sairang leh Kolasib inkar kawngpui an enfiahna a, harsatna awm leh hmalak mek dan te en a ni.
He hunah hian BJP State President Vanlalhmuaka leh Dr K Beichhua, MLA, State Core Group Member leh State Media Convener leh hruaitu dangte bakah thuthar thehdarhtu thenkhatte an tel.
BJP State President Vanlalhmuaka chuan Mizoram châk lakna ber kawngpui chu Mizoram sorkar leh NHIDCL-te inmawhpuh kual mai mai lova kawngpui pawimawh a nih avangin sorkarin mawh a phur a, a neitu tak tak state sorkar hian a thatna tur leh hnathawh dan vil a uluk enfiahtu tur monitoring committee din ngei turin sorkar hian hma la ngei se a duh thu a sawi.
Vanlalhmuaka chuan Vairengte leh Sairang inkar kawng hi kum 2020-ah sorkar laipuiin kawng siam hi phalsakin kum hnih chhunga zo thei turin a lo remti tawh a. Mahse, Mizoram sorkar leh NHIDCL te inkarah forest clearance leh zangnadawmnaah harsatna a awm avangin hna tan theih a ni ta lo va; chuvangin, a chhe ta hle a, kum tin an buai phah avangin kawng siam mekah puih an inhuam thu a sawiin, “Ram tana kan rawngbawl chhan Mizoram mipuite mai bakah lirthei khalhtuten hetiang taka kawng that loh avanga harsatna an tawh tawh lohna tura rang taka hma la turin state sorkar pawh kan phut tlat a ni,” a ti.
Dr K Beichhua pawhin thu sawiin inkalpawhna kawng pangngai piah lamah ei leh bar lak luhna bul ber kawngpui tha lo leh thal lai pawha truck lian khalhtute nawrh ngai khawp a ngaihsak loh a ni chu state sorkar mawhphurhna a nih thu a sawi a. Tuna kawngpui thawm that dan en hi chuan furpui thlen hmaa kawng an hnawhna hi a chhiat leh hman mai a hlauhawm hle a, Mizoram sorkar hian hetiang lo deuha kawngpui hi thawm that hna thawk turin a ngen.
He kawngpui chhe lai bik siamna tur atana sum an dah, Rs vbc 1.25 hian rintlaka kawngpui hi a siam theih dawn loh avangin Mizoram sorkar hian ngaihtuahna seng nawn leh tur leh kawng daih rei zawk, kum 15 daih em lo mah se, fur harsat zual lai thleng tala tha tura kawng siamna tur sum MPWD ruahmansak turin a ngen bawk.
BJP Mizoram tar lan danin Buichali lei atanga New Khamrang thleng hi MPWD-ten an siam hleihtheih loh avangin tunah hian BR Goyel Company chuan a siam hna thawkin March, 2025 chhunga siam zawh hman an inbeisei a, NHIDCL hnuaia kawng siam dang pawh thal chhunga siam that theih an inrin thu NHIDCL hruaitute chuan an lo hrilh a ni.