Manchester United leh Chelsea te chuan Alejandro Garnacho leh Christopher Nkunku te chu inthleng dan kawng an dap mek niin thu thang a awm.
Garnacho leh Nkunku te hian an khelhna club ve veah beisei an pha lo dun hle a, hei vang hian an khelhna club te chuan hmun danga chhuahtir an hreh loh phah ve ve niin an sawi.
Chelsea chuan pangngai takin Manchester United hnenah Garnacho lei an dil dawn a, a hmaa Garnacho beiseitu Napoli chuan Borussia Dortmund winger Karim Adeyemi an ngaihven tak avangin London khaw club hian lak theih ngei an beisei hle.
Kar hmasaah khan Chelsea chuan Manchester United hnenah kum 20 mi Garnacho chu £ maktaduai 65-a lei an lo dil tawh a, Napoli pawhin £ maktaduai 45 atanga 50 bawr velin an dawr ve bawk a. Napoli hian Adeyemi lam an hawi tel a, player pakhat chauh lak luh an tum avangin Garnacho hi chu an beisei zui a rinawm vak lo.
Nkunku chuan Stamford Bridge-ah khelhna hmun a chang tam lo hle a, hei vang hian hmun dang pan a hreh lo hle niin an sawi a. Bayern Munich hnena hralh a ni mai thei tih thu thang a awm a, chutih rualin Garnacho nen an inthleng lo ang tih sawi theih a ni lo tih thawm a awm bawk.
Club pahnihte hian thutlukna eng mah an la siam lo a, indawrna mumal tak pawh a awm rih lo a nih hmel a, hetiang hawi zawng erawh hi chuan an indawr tawh ngei a ni tih Florian Plettenberg chuan a sawi.
Garnacho agent Carlos Cambeiro leh Quique de Lucas te chuan Thawhtannia Chelsea leh Wolves inkhel kha an en a, an nau chu London khawpui lam pantir an hreh lo a nih hmel.
United hian Garnacho an hralh thei a nih chuan pawisa hman chungchanga inkaihhruaina dan hnuaiah an dinhmun a tha hle dawn niin a lang a. Chelsea hian Nkunku an hralh dawn a nih chuan £ maktaduai 60 aia tlem lo an beisei a ni.
Player pahnihte hian Premier League season kal mekah goal nga an thawk chhuak tawh a, Garnacho chuan goal thum thun tahwin Nkunku chuan goal hnih a thun tawh a. Manchester United game 22 khelhah Garnacho chuan vawi 11 bul a tan tawh a, Nkunku erawh chuan Chelsea tan vawi thum chauh bul a la tan ve thung a ni.