AZL: Excise and Narcotics Department (END) leh Assam Rifles thawk dunin January 24, 2025 zan dar 6:30 khan Chhungte khua, Champhai district-ah heroin kg 5 & gram 73 (hawng 440) leh a neitu nia puh mi pahnih an man.
Heroin neitua puhte hi Gilbert Lalnunhlima (27), Bairabi (Rail crossing) leh Lalawmpuia (29), Zemabawk (Beraw) nia inchhalte an ni a. Heroin phurhna atan an hman, truck, TATA 1618C Regn. No. MZ01F-9135 chu hrensak an ni bawk.
Hemi zan vek hian heroin gram 23.600 (Hawng hnih) leh a neitu nia puh, Rorelkima (27), Vanhne, Lunglei district-a khawsa nia inchhal an man bawk.
Rorelkima hnen atang hian heroin phurhna atana a hman, Maruti Alto K-10 thar hlak, registration number la nei lo pawh hrensak a ni bawk.
Heroin vanga mante hi Narcotic Drugs & Psychotropic Substances Act, 1985 tlawhchhanin thubuai siamsak an ni a, District & Sessions Court, Champhai district-ah hruai an ni.