MMA huanga thla 28 zet a inlan tawh loh hnuah Indian mixed martial arts star Ritu Phogat chu a rawn inlan leh dawn a, nu a nih hnua a inlan hmasak ber a ni ang.
Phogat hian February 20-ah khian Japanese fighter Ayaka Miura chu Qatar rama Lusail khawpuiah a hmachhawn dawn a, a inlan hnuhnun ber chu thla 28 kal taa One Championship huanga a tel kha a ni a. Phogat hi vawi sarih a chak tawh a, chak loh vawi thum a nei tawh bawk a. Zombie tia hming lem an vuah, a khingpui tur Miura chu vawi 14 chak tawhin, vawi nga a chak lo ve tawh bawk a, third-degree judo black belt a ni.
2019 atang khan Phogat chuan MMA huangah bul a tan a, a insual hmasak berah Nam Hee Kim chu TKO-in a hneh nghal a. A zawnin vawi li a chak nghal a, Bi Nguyen chu split decision in a hneh lo a, hei hi a chak loh hmasak ber a ni.
He mi hnuah hian vawi thum chu a zawnin a chak zui leh a, Stamp Fairtex a hneh lo leh a, armbar hmanga chak lo a nih rualin hei vang hian a dar a tina a, thla kua zet a chawlh phah a. A rawn inlan leh hnuah Tiffany Teo a hmachhawn a, submission hmangin a chak lo leh bawk a. He mi hnuah hian hun eng emaw chen chu a chawl zui leh ta a ni.
Kum 30 mi, Phogat chuan, “Ka insual hnuhnun pahnihah khan submission hmangin ka chak lo ve ve a, a lawmawm lo khawp mai a. Khatiang result khan tan lakna tur min hriattir chiang hle,” a ti.
Phogat hian Washington lamah coach Siyar Bahadurzada kaihhruaina hnuaiah training a nei mek a, kar khatah ni ruk chhung chu training hi an nei a, ni khatah vawi hnih emaw, vawi thum emaw training an nei ziah a ni.