Aizawl: North East Regional YMCA Meeting chu January 25, 2025 (Inrinni) chawhma dar 11 khan Mizoram House Shillong-ah neih niin he hunah chairman kal chhuak ta, Dr R Lalthangliana chuan chairman thar hnenah charge a hlan.
Dr R Lalthangliana hian NE Regional YMCA chairman nihna hi kum riat lai (term nga) a chelh tawh hnuin kumin hian a term a lo tawp ta a. Inrinni khan chairman thar, Andrew Ahoto, Dimapur hnenah charge a hlan a. He hunah hian office bearer thar leh executive committee member thar thlan chhuah nghal an ni.
Hruaitu tharte Pathian hnena hlanna hun hi Most Revd. Dr. P Lyngdoh-a’n Shillong Mizoram House Conference Centre-ah a nei a. Hemi zawh hian NE Regional YMCA meeting neih zui nghal niin, Shillong-a hmarchhak kristian thalaite puala ram neih dante leh hmarchhak state hrang hranga Kristian thalaite kawng hrang hranga thawhhona tha zawk neih zel nan hmalakna tur chi hrang hrangte meeting-ah an sawi ho a ni.
Meeting neih zawh hian zanriah an kil ho a. He hunah chairman kal chhuak ta, Dr R Lalthangliana chuan thu sawiin, hmarchhak thalaite thawhho that a tulnate, harsatna tam tak an sut tlante leh tul tam tak awmte an hmachhawnnaah inlungrualna tha nen thawh chhuah a tul zel thu a sawi a. Kum riat lai NE Regional YMCA chairman a lo nih tawh chhunga state hrang hranga YMCA-ten an tawiawm tawhnaah lawmthu a sawi nghal bawk.