- Dr. JT Vanlalngheta; Ziah Run, Zonuam East
Lalthara-te Unau Foundation (LUF)-in ram ngaw leh nungchate humhalh thate lawm man an hlan Ni–Zirtawpni 17.1.25-ah khan tel ve tura min sawm angin ka han tel ve a, nungcha hmangaihtu khaw 5 atanga lo kalte leh mi dangte a taka ka han tawng chu ka lawm hle. Mizoram, Krista zuitute (Kristian) ram tia hriatah hian nungchate nena chen ho hi kan la thiam lo hlea, a zira zir hmanhmawh a ngai a ni. Tun hnaia Dawrpui West-a sanghar (leopard cat) thih dan atang khan ‘chên ho’ chu thu hran, nungchate hmelma ena en kan la thahnem hle tih a lang reng mai; a vanduaithlâk tak zet a ni. Kan zui ber, kan Lalpa Isua pawh kha Setana nen ni 40 leh zan 40 an in hmachhawn hnu khan hun eng emaw chen chu ramsate chenna a bel tih kan hre reng si a (Marka 1:13).
LUF khan ram ngaw leh nungchate humhalh tha khaw 14 an thlanah khaw 5 an thli fîm leh a, hei hi sumin a daih loh vang niin a lang; he LUF Foundation hminga sum leh pai thawh thei te hi awm se aw, tiin ka lo ngaihtuah ve neuh neuh a.
Mizoram khaw 5—Leng, N. Mualcheng, Rulkual, Tualbung leh Zoteten ram ngaw leh nungcha humhalh that lawm man Rs 1,00,000 leh Citation an dawng theuh hian khaw tangrual tak an nihzia a lang chiang hle a, a ropuiin ‘hma sawnna’ kawng dangah pawh khaw tang rual thei tak tur an ni tih a chiang reng mai; fak an phu hle a, nungcha humhalh kawnga hma hruaitu (pioneer), khaw dangte pawhina entawn phû an niin ka hria. Mizoramah ram ngaw leh nungcha hunhalh tha khaw 14 te hi lawm man pek kim theih pawh ni teh reng se, khaw awm zat 829 (rf: 2011 C) atanga chhut chuan kan ram ngaw leh nungchate humhalh kawngah kan zaa tih tur a la tamzia a chiang hle a ni; ‘….thil siam zawng zawngte chuan beisei em emin Pathian fate lo lanna chu an nghakhlel hle si….. (Rom 8:19) tih a taka chantir turin ke i pen zel ang u. Puan ven sawi chhinga, kan zaa tan a ngai tak zet e. An ei tur kan tih chereu zel avangin, min la hnaih tial tial maithei bawk, Pathian thu angin, ringtute hi min la rawn bel dawn chauh ni te pawhin a lang (….chhiatna bawih ata tih chhuahin an awm ang a, Pathian fate zalenna ropuiah chuan an lût dawn si a: 21 ibid); anmahni ti hlum lova Pathian thu anga kan lo chenpui thiam a la ngai dawn chauh; mâwlna kal pelin rilru inbuatsaih a hun tawh hle.
LUF buatsaiha inhmuh khawmnaah khan, hun a tlem vang pawh a ni ang e, lawm man latute ai awha lo kalte bakah khan nungcha leh ram ngaw humhalhna lama tawn hriat neite kha thu sawi tura koh tam ni se, tih kha ka duh thu sam a lo ni a; Ruatfela Nuin thu sawina hun a chang lo te kha ka lo ui hle.
Zo fate ti hming thatu, unau thuma UPSC Civil Services Exam kal tlanga All India Services ‘AIS’ =IAS (Central Service ni lovin; AIS leh Central Service hi i ngaih pawlh tawh lo ang u)-a inziak tling te unauhoina ram ngaw leh nungchate humhalh nana LUFdina, sum leh pai thahnem tak an sêng hi an fakawm hle.