Aizawl: Mizoram Larsap Vijay Kumar Singh hovin Inrinni khan National Voters’ Day 2025, a tum 15-na state huapa lawmna pui ber chu Assembly Conference Hall-ah neih a ni.
He hunah hian larsap chuan hian National Voters’ Day pual thuchah a sawi bakah vote nei tharte hnenah EPIC a hlan a, Aizawl district chhunga Booth Level Officer hnathawk tha zualte hnenah BLO Award a hlan nghal bawk.
National Voters’ Day hi January 25, 1950-a din, Election Commission of India (ECI) dinchampha pualin kum tin January 25-ah hman thin a ni a. Voter-te hnena inthlan kaihhnawih pawimawhte hrilhhriat nana hman thin a ni a, kumin hian thupui atan ‘Vote thlak tluk a awm lo, Vote thlak ngei ka tum e’ tih hman a ni.
Kumin January 6-a Final Electoral Roll, 2025 tlangzarh takin a tar lan dan chuan, Mizoramah vote nei mi 8,69,813 an awm a. Heng zinga 4,20,888 te hi mipa niin, hmeichhia 4,48,925 an awm bawk.