Belgian footballer Radja Nainggolan chu cocaine tawlh rukna an chhuinaa police-in an mi man zingah a tel ve.
Kum 36 mi hi Thawhtanni tuka Belgian police-in an rinhlelh mi eng emaw zat an man zingah a tel ve a. An chhuinaah hian an ram chhung hmun eng emaw zat an dap bawk.
“Kan thil chhui hi South America atanga Europe-ah, Antwerp lawngchawlh hmun kaltlanga cocaine thawn luh thil a ni a, Belgium atang hian hmun hrang hrangah sem darh leh a ni a, kaihhnawih pawh a ngah hle a ni,” tiin Brussels prosecutor pisa chuan thuchhuah an siam.
Hei bak hi vantlang zingah thuchhuah leh thil awm dan puanzar an la nei rih lo.
Man a nih hma ni ruk lekah khan Nainggolan-a hian inkhelh a chawlhsan tawhna atanga kir lehin Belgian second division-ah Lokeren tana khel leh turin contract a ziak nghe nghe a ni.
A inkhelh hmasak berah K.Lierse mikhualin 1-1-in an inhnehtawk a, a goal thun hmangin point khat an hlawh chhuak.
Antwerp khawpuia piang leh sei lian, midfielder hian a inkhelh hun chhung tam zawk chu Italy-ah hmangin Roma leh Inter Milan-ah pawh a lo khel tawh thin.
Kum 2009 leh 2018 inkar khan Belgium tan pawh vawi 30 a lo khel ve tawh bawk.