Aizawl: BJP Mizoram State Core Group member Dr K Beichhua, MLA chuan National Highway leh Mizoram kawng chhia avangin a natna neih chu a rilru natna a nih thu a sawi.
Nimin khan BJP Mizoram chuan an pisa-ah chawlhkar thar inhlanna leh political session an nei a. He hunah thu sawiin Dr K Beichhua chuan chhimtawp atanga hmartawp thlenga an zin kual hian mi thenkhatin kawng avanga harsatna an chu an hnungzang na te, an sil thenthum tihte a ni thin. Mahse, ani erawh kawngpui avanga a natna neih chu a rilru na hi a nih thu a sawi.
Dr K Beichhua chuan Titanic lawng lian a pil hma khan hma lamah vur tlang sut tur a awm thu vawi thum lai a khalhtu an hrilh hnuah pawh a ngaihsak tha duh lo va, chhiatna nasa tak a thleng ang khan Mizoram châk lakna pui ber kawng pawh an enfiah atangin tun ang mai maia an ngaihsak lo a nih chuan vur tlang sut ang tho khan Mizoram mipui hian kawng chhiat avangin nasa takin harsatna an tawk dawna a lan thu a sawi.
BJP MLA chuan, “Kan state-a sorkar lai mek kaihhruaina hnuaiah kan hma lamah vur tlang lian kan sut mai hi a hlauhawm a. Warning kan pe duh a, Mizoram mipuiten harsatna lian zawk kan tawh loh nan khawngaih taka kan thurawn pek hi awiha hma min laksak turin kan ngen a ni,” tiin, mipui lam pawh thal lai a nih vanga ngawi mai mai lovin fur laia ngaih pawimawh a nih ang aia nasa zawk hialin, kawngpui siam that a nih theih nana sorkar au eih turin a sawm nghal bawk.
State President Vanlalhmuaka kaihhruai inkhawmah hian Vanupa Zathang chuan tun tum village council leh local council inthlan lo awm turah, BJP Mizoram chuan seat 195 chuh a nih tur a sawi a ni.