Aizawl: Mizo Zirlai Pawl (MZP) hruaitute chuan Mizoram Larsap Vijay Kumar Singh hnenah Free Movement Regime (FMR) leh Border Fencing chungchanga an ngaihdan leh an dinna an hrilh.
Thawhtanni khan MZP hruaitute chuan Larsap hi a chenna Raj Bhavan-ah an kawm a, hnam khat, chi khat, unau ramriin a thendarhte insuihkhawm hi an hmathlir a nih mek laia zalen taka inkalpawhna tihtawp a ni leh ramri hung tumna an duh loh thu an hrilh.
Hemi chungchangah Larsap hnenah a theih ang anga hmalakpui turin an ngen nghal a. Union Home Minister hnena hemi chungchanga MZP lehkha thawn tur an hlan nghal.
MZP chuan Mizo zirlaite tan Study tour buatsaih sak turte leh Railway hnuaia hna ruakah Mizo zirlai a tam thei ang ber an luh theih nan, Mizoramah exam centre dah a nih theih nana hmalaksak turin an ngen bawk.
Larsap chuan MZP ten zirlaite hmakhua ngaia a hnena an thil thlente chu theih ang anga a bawhzui tur thu a sawi a. Kawng hrang hrangah thawhpui tura lo sawmin, zirlaite ruihhlo laka an fihlîm theih nan theihtawp a hmala turin a lo fuih a. Hemi kawnga an hmalaknaah chuan, amah pawh a inhawn hle tur thu a sawi a. Mizoram a ruihhlo hluar lutuk a vei thu a sawi bawk.