Uttarakhand BJP MLA hlui, Kunwar Pranav Singh Champion leh independent MLA ni mek, Umesh Kumar te chu Pathianni khan tharumin an intawng a, silai hial a puak a, man ve ve an ni.
Roorkee-a an pisa chu an inkhawihsak ve ve a. Politician pahnih hi hun rei tak atanga lo inhal tawh kha niin social media-ah pawh an inbei nasa thin hle.
Video darh pakhatah chuan Champion-a hian amah tantute nen Kumar-a pisa hi chhun en laiin an kap a. Pistol an lek lang lai te, lung leh thil danga an vawm lai te pawh a lang a. Hemi hnu rei lo teah hian Kumar-a leh a hotute hian Champion-a pisa an kap veleh a ni.
Politician pahnih lakah hian thubuai pahnih siamin man ve ve an ni a. Champion-a hi Ranipur Police Station-a lak a ni a, Kumar hi Roorkee-ah lak a ni thung.
Champion-a’n a sawi dan chuan Khanpur MLA hian Inrinni zan khan Landhaura-a a mansion chu beiin a tawngkam pawh a mawi lo hle tih a sawi a. “Ka tilet a, chu chu dik lo a ni si. Ka bei zel ang,” tiin police van-a a awm laiin thuthar lakhawmtute hnenah a sawi.
Champion-a nupui chuan thil thleng avang hian Kumar-a lakah thubuai an thlen a; mahse, engmah a laka hmalakna a awm loh avangin ‘kan zahawmna hum nan’ a pisa an bei ve ta tih a sawi.
Kumar-a pawhin Champion-a hian ni hnih kal ta khan nasa taka sawi chhiain a nu leh pa thlengin social media-ah a sawi chhia tih a sawi a. He mi thinrim hi Laksar MLA hlui inah hian kalin a chet ve tak thu a sawi.
Police chuan district magistrate hnenah an silai license chu cancel an dil nghal a, venhimna pek turin an ti bawk tih Haridwar SSP Pramendra Singh Doval chuan a sawi.
“Tute mahin anmahni thuin dan an chelek ngawt thei lo,” a ti.