Aizawl: LAD Minister C Lalsawivunga chuan danin thuneihna a pek ang leh ram dinhmun ngun taka ngaihtuah chungin village/local council inthlan hun an puang tih a sawi.
ZPM-in nimina an party pisa-a chhung inkhawmah C Lalsawivunga chuan sorkar laipui finance commission atanga grant an hmuhte a tlem tial tial avang leh inthlan hautak zet buatsaih a ngaih thin avangin mipui phurrit an siam loh nan leh an sum hmuh ang angte dik zawka an kalpui theih nan, Mizoram sorkar chuan VC/LC inthlan hun an puang fel a. Chutih laia high court-a an khing chu vanduaithlak a tih thu a sawi.
C Lalsawivunga chuan kum 2024-a Mizoramin Cyclone Remal avangin chhiatna nasa tak a tuar a, furpui a lo thlenin Mizoramin kawng hrang hrangah harsatna a tawk thin a. Sorkar kum thar lo awm turah hian a lan danin inthlan pawimawh tak tak pali hmachhawn tur a awm a, August-ah village council, September-ah local council, November – December-ah LADC, kum a lo thar anga AMC inthlan a lo awm leh dawn tih sawiin, “Inthlan hi a hautak em em a, sorkar sum a kalral nasat thin avang leh mipuiten an tawrh loh theih dan ber tur ngaihtuahin sorkar chuan VC/LC inthlan hun a puang hma ta a ni,” tiin, danin thuneihna a pek ang leh ram dinhmun ngun taka ngaihtuah chungin inthlan hun an puang ta a. Kum 2020-ah pawh Covid avangin inthlan hun pawhtlai a lo ni tawh tih a sawi.
Kum khat awrh sorkar an chan chinah kohhran hrang hrangte tawngtaipuina an dawng nasa em em tih sawiin C Lalsawivunga chuan, “He sorkar Pathianin min kaihhruai zia pawh a hmuh theih a ni,” a ti a. Inthlang ram an nih angin VC/LC inthlan lo awm turah pawh hian vote thlak thei tawh phawt chuan khua leh tui an nihna anga an mawhphurhna a nih avangin thahnem ngai takin vote thlak theuh turin a sawm.