Thangram Indigenous Peoples’ Movement (TIPM) hruaitute chuan nimin khan MZP te phungbawma sawmin chief minister an hmu a, Mizoram chhunga beh an duh thu chu an thuken lian ber a ni.
TIPM te hian sorkar hmasa hun lai atang tawh khan Mizoram chhunga beh duh hian nasa takin hma an lo la tawh thin a, MZP te belin, anni lam hian an pisa thlengin an tan an buatsaihsak a, riah leh veivahna engkim an lo buaipui tawh thin a ni.
Sorkar-na inthlak hnu, sorkar thar chak taka a kal vung chhoh leh hnu pawh hian an dinna leh duhna chu a la ngai reng a, nimin khan MZP te nen chief minister chu Mizoram chhunga beh an duh thu an hrilh leh a, Thangram chin chu Mizoram chhunga rin luh an duh thu leh hmalakpui turin an ngen zui bawk.
Heti taka kan ram chhunga beh duh leh awm duh an awm hi a lawmawm a, tute emaw awm tha duh hlei lo kan vulh viau thin nen chuan a dan a dang ta hle. Sorkar pawh hian ngaihtuahna seng ngun viau se la, Assam awp chhunga awm Thangram chin hi kan ta neih thiam a, an duhna kan tihhlawhtlinpui ngei chi ni pawhin a lang.
Thangram hi Assam state chhunga awm mek niin, Singla valley leh Langkaih valley-a zofa hnam hrang hrangte chenna hmun a ni a, an sawi dan chuan anmahni awptu sorkar hian a ngaihsak lovin hnam lian zawk ten an nek reng bawk a, an tan Mizoram, an inpui dik taka beh chu tihmakmawh a nih thu an sawi a, Mizoram hruaitute pawhin ngaihtuahna hmanpui thuai thuai thiam se a tha awm e.